App Store-ից հեռացվել են VK հոլդինգի մի շարք հավելվածներ

App Store-ից հեռացվել են VK հոլդինգին պատկանող մի շարք հավելվածներ։ Օգտատերերի համար ներբեռնման այլևս հասանելի չեն «Дзен», VK Video, VK Messenger, VK Music և «VK Знакомства» հավելվածները,- հայտնում է РБК-ն։

VK հոլդինգի մամուլի ծառայությունը РБК-ին հայտնել է, որ ընկերությունը երբեք չի գտնվել պատժամիջոցների ներքո և չի ներառվել որևէ պատժամիջոցային ցուցակում, ինչը, ըստ նրանց, հաստատվում է միջազգային և ամերիկյան իրավաբանների բազմաթիվ եզրակացություններով։ Նրանց խոսքով՝ Apple-ին տրամադրվել են համապատասխան իրավական փաստաթղթեր, սակայն ընկերությունն առանց նախազգուշացման միակողմանիորեն հեռացրել է VK-ի հավելվածները։

VK-ում նաև նշել են, որ նախկինում տեղադրված հավելվածները Apple սարքերում կշարունակեն աշխատել, սակայն օգտատերերն այլևս չեն ստանա push-ծանուցումներ։

2025 թվականին ռուսական App Store-ից հեռացվել է 1213 հավելված՝ հավելվածների խանութի թափանցիկության զեկույցի համաձայն։ Apple-ն իր հերթին ընդգծել է, որ հավելվածները հեռացնում է միայն տվյալ երկրի իշխանությունների պահանջով։ 2024 թվականին հեռացվել է 171 հավելված, 2023-ին՝ 12, իսկ 2022-ին՝ 7։