Վենեսուելայում երկրաշարժի զոհերի թիվը մոտենում է 200-ի

Վենեսուելայում հունիսի 24-ի երեկոյան տեղի ունեցած հզոր երկրաշարժի հետևանքով զոհերի թիվը մոտենում է 200-ի, իսկ վիրավորների թիվը գերազանցել է 1000-ը։ Այս մասին ռուսական ՏԱՍՍ գործակալությանը հայտնել է վենեսուելացի քաղաքական գործիչ Վիլիան Ռոդրիգեսը։

«Դեռ վաղ է խոսել ճշգրիտ թվերի մասին, սակայն զոհերի թիվն արդեն մոտենում է 200-ի, իսկ վիրավորներինը գերազանցում է 1000-ը», - նշել է Ռոդրիգեսը, որը հանդիսանում է «Պոդեմոս» («Մենք կարող ենք») կուսակցության փոխնախագահը։ Կուսակցությունը համագործակցում է իշխանական Վենեսուելայի Միացյալ սոցիալիստական կուսակցության հետ։

Նրա խոսքով՝ մայրաքաղաք Կարակասի բնակիչները խուճապի և սարսափի մեջ էին երկրաշարժի ուժգնության և տևողության պատճառով։ Զգալի վնասներ են արձանագրվել քաղաքի արևելյան շրջաններում և Լա Գուաիրա նահանգում, որտեղ բազմաթիվ շենքեր են փլուզվել։ Միաժամանակ հաղորդվում է, որ նավթային օբյեկտներն ու կենսական նշանակության ենթակառուցվածքները չեն վնասվել։

Երկրաշարժը գրանցվել է հունիսի 24-ի երեկոյան։ Մոտ 40 վայրկյան տարբերությամբ արձանագրվել են երկու ուժեղ ստորգետնյա ցնցումներ՝ 7,2 և 7,5 մագնիտուդ ուժգնությամբ։ Էպիկենտրոնները գտնվել են Յարակույ նահանգում՝ միմյանցից մոտ 10 կիլոմետր հեռավորության վրա։ Դրանց հաջորդել է շուրջ 30 հետցնցում։ Վենեսուելայի իշխանությունները երկրում հայտարարել են արտակարգ դրություն, իսկ Լա Գուաիրա նահանգը ճանաչվել է աղետի գոտի։ Այս մասին հայտնում է TASS-ը: