Իսրայելը պատրաստվում է պաշտոնապես ճանաչել Հայոց ցեղասպանությունը

Իսրայելի վրեժը մատուցվում է սառը․ արտաքին գործերի նախարար Գիդեոն Սաարը կառավարության առաջիկա նիստում կներկայացնի առաջարկ՝ Իսրայելի Պետության կողմից պաշտոնապես ճանաչելու Հայոց ցեղասպանությունը։

Որոշման նախագծում նշվում է, որ, ելնելով բարոյական և պատմական պարտքից, Իսրայելը ճանաչում է հայ ժողովրդի ցեղասպանությունը, որը կատարվել է Օսմանյան կայսրության գոյության վերջին տարիներին։ Նախագծով նաև առաջարկվում է դատապարտել այդ իրադարձությունների վերաբերյալ պատմական ճշմարտության ժխտման, նսեմացման կամ խեղաթյուրման ցանկացած փորձ։ Կառավարության կողմից հաստատվելուց հետո փաստաթուղթը կներկայացվի Քնեսեթի քննարկմանը։

Հայոց ցեղասպանությունը սկսվել է 1915 թվականի ապրիլին՝ Կոստանդնուպոլսում հարյուրավոր հայ մտավորականների, հասարակական գործիչների և համայնքի առաջնորդների ձերբակալություններով, տեղահանությամբ և սպանություններով։ Համայնքի ղեկավարության ոչնչացումից հետո օսմանյան իշխանությունները ձեռնամուխ եղան հայ բնակչության համակարգված բնաջնջմանը։ Տղամարդկանց ուղարկում էին հարկադիր աշխատանքի, որտեղ նրանց սպանում էին։ Կանանց, երեխաներին և տարեցներին տեղահանում էին և քշում դեպի սիրիական անապատ, որտեղ նրանք ենթարկվում էին զանգվածային սպանությունների, բռնաբարությունների, սովի և ծարավի։ Արդյունքում զոհվեց շուրջ 1,5 միլիոն հայ, իսկ Անատոլիայում հայ ժողովրդի բազմահազարամյա մշակութային և պատմական ժառանգությունը գրեթե ամբողջությամբ ոչնչացվեց։

Չնայած բազմաթիվ պատմական վկայություններին և փաստաթղթերին՝ Թուրքիան մինչ օրս հերքում է Հայոց ցեղասպանության փաստը և նույնիսկ վերաշարադրում է սեփական պատմության դասագրքերը։ Այսօրվա դրությամբ 32 պետություն արդեն պաշտոնապես ճանաչել է Հայոց ցեղասպանությունը՝ իրենց խորհրդարանների որոշումներով կամ պաշտոնական հայտարարություններով։