ԱՄՆ-ի ներքին անվտանգության նախարար. Ժամանակավոր կարգավիճակ ունեցող միգրանտները պետք է օրինականացվեն կամ վերադառնան հայրենիք

ԱՄՆ-ի ներքին անվտանգության նախարար Մարկուեյն Մալլինը հայտարարել է, որ ժամանակավոր պաշտպանված կարգավիճակի (Temporary Protected Status, TPS) ծրագրով երկրում գտնվող միգրանտները պետք է կա՛մ ձևակերպեն մշտական ներգաղթի կարգավիճակ, կա՛մ վերադառնան հայրենիք։

«Կա՛մ փորձեք փաստաթղթեր ձևակերպել, որպեսզի այստեղ մնաք մշտական հիմունքներով, կա՛մ մենք կօգնենք ձեզ վերադառնալ ձեր երկիր», — ասել է Մալլինը CNN հեռուստաալիքի State of the Union ծրագրի եթերում։

Ըստ նրա, ԱՄՆ-ի իշխանությունները պատրաստ են այդ միգրանտների համար վճարել հայրենիք վերադարձի թռիչքի ծախսերը և տրամադրել մոտ 2 100 դոլար՝ վերադարձից հետո տեղավորվելու հարցում օգնելու համար։

«Մենք իսկապես կվճարենք ձեր ավիատոմսը և կտրամադրենք մոտ 2 100 դոլար, որպեսզի օգնենք ձեզ նորից տեղավորվել։ Բայց ժամանակավոր պաշտպանված կարգավիճակը՝ ինչպես բխում է դատարանների որոշումներից և հենց անվանումից, մշտական կարգավիճակ չէ», — ընդգծել է նախարարը։

Հայտարարությունը հնչել է մի քանի օր անց այն բանից հետո, երբ ԱՄՆ-ի Գերագույն դատարանը թույլ է տվել երկրի նախագահ Դոնալդ Թրամփի վարչակազմին Հաիթիից և Սիրիայից հարյուր հազարավոր ներգաղթյալների զրկել մարդասիրական կարգավիճակից, որը նրանց պաշտպանում էր զինված հակամարտություններից և հումանիտար ճգնաժամերից տուժող երկրներ արտաքսումից։

Ամերիկյան օրենսդրությունը թույլ է տալիս ժամանակավոր պաշտպանված կարգավիճակ տրամադրել այն օտարերկրացիներին, որոնք լքել են իրենց երկրները պատերազմի, բնական աղետների կամ այլ արտակարգ հանգամանքների պատճառով։ Նախկինում այս կարգավիճակը բազմիցս երկարաձգվել է։

Միևնույն ժամանակ ԱՄՆ-ի Պետդեպարտամենտը դեռևս խորհուրդ է տալիս քաղաքացիներին զերծ մնալ Հաիթի և Սիրիա ուղևորություններից՝ բռնության, հանցավորության, ահաբեկչության և մարդկանց առևանգումների բարձր մակարդակի պատճառով։

Հաիթիի քաղաքացիների համար TPS ծրագիրը ներդրվել է 2010 թվականի ավերիչ երկրաշարժից հետո, իսկ սիրիացիների համար՝ 2012 թվականին քաղաքացիական պատերազմը սկսվելուց հետո։