Էստոնիան պատրաստակամություն է հայտնել հանդուրժել իր տարածքում ուկրաինական անօդաչու թռչող սարքերի կործանումը

Էստոնիան պատրաստ է հանդուրժել ուկրաինական անօդաչու թռչող սարքերի խոցումը ՆԱՏՕ-ի տարածքում, եթե դա լինի Ռուսաստանի վրա հարձակումների գինը, Financial Times-ին (FT) տված հարցազրույցում հայտարարել է Էստոնիայի արտաքին գործերի նախարար Մարգուս Ցախնան։

«Իհարկե, նման միջադեպերը մեզ չեն ուրախացնում։ Բայց մենք չենք խնդրում Ուկրաինային դադարեցնել», - ասել է քաղաքական գործիչը։

Հունիսի 22-ին հաղորդվեց, որ Էստոնիայի Ռյուգե շրջանի տեղացի բնակիչը դաշտում հայտնաբերել է 5 կգ պայթուցիկ նյութով լի անօդաչու թռչող սարք։ Էստոնիայի անվտանգության ոստիկանության խորհրդի տվյալներով՝ ուկրաինական անօդաչու թռչող սարքը, հնարավոր է, վթարի է ենթարկվել հունիսի 3-ին Ռուսաստանի վրա հարձակման ժամանակ։ Սանկտ Պետերբուրգի կառավարության մամուլի ծառայությունը հունիսի 3-ին հայտնեց, որ Ուկրաինայի զինված ուժերի անօդաչու թռչող սարքերը հարձակվել են Կրոնշտադտի և քաղաքի Կիրովսկի և Կրասնոսելսկի շրջանների ենթակառուցվածքների վրա։