ՄԱԿ-ի կանխատեսում. Ռուսաստանը կավելացնի մսի և ցորենի արտահանումը մինչև 2035 թվականը

ՄԱԿ-ի Պարենի և գյուղատնտեսության կազմակերպության (FAO) և Տնտեսական համագործակցության և զարգացման կազմակերպության (OECD) համատեղ կանխատեսման համաձայն՝ առաջիկա ինը տարում Ռուսաստանից հիմնական մսատեսակների արտահանումը զգալիորեն կաճի։ Այս մասին հայտնում է РИА Новости-ն։

Կանխատեսման համաձայն՝ 2035 թվականին Ռուսաստանից տավարի մսի արտահանումը կարող է հասնել շուրջ 38 հազար տոննայի, խոզի մսինը՝ 146 հազար տոննայի, իսկ թռչնամսինը՝ 350 հազար տոննայի։ Համեմատության համար նշվում է, որ 2023–2025 թվականներին այդ ցուցանիշները համապատասխանաբար կազմել են մոտ 36 հազար, 127 հազար և 307 հազար տոննա։

Փորձագետների գնահատմամբ՝ ամենաարագ աճը կգրանցվի թռչնամսի արտահանման ոլորտում։ Բացի այդ, կանխատեսվում է նաև Ռուսաստանի հիմնական գյուղատնտեսական մշակաբույսի՝ ցորենի արտահանման աճ․ մինչև 2035 թվականը այն կարող է գերազանցել 60 միլիոն տոննան՝ ներկայիս միջին շուրջ 46.2 միլիոն տոննայի համեմատ, ինչը մոտ 25 տոկոս աճ է։