Մոնակոյում տեղի ունեցած պայթյունը չի որակվել որպես ահաբեկչություն

Մոնակոյի գլխավոր դատախազ Ստեֆան Տիբոն հայտարարել է, որ իշխանությունները բնակելի շենքի մոտ տեղի ունեցած պայթյունը չեն դիտարկում որպես ահաբեկչական գործողություն։ Նրա խոսքով՝ նախնական քննության տվյալներով՝ դեպքը որակվել է որպես սպանության փորձ, հայտնում է Nice-Matin պարբերականը։

Ավելի վաղ Մոնակոյում հզոր պայթյուն էր տեղի ունեցել բազմաբնակարան շենքի մուտքի մոտ։ Տեսահսկման տեսախցիկները ֆիքսել էին անհայտ տղամարդու, որը պայթյունից քիչ առաջ դեպքի վայրում թողել էր ուսապարկ և հեռացել։

Պայթյունի հետևանքով տուժել են ուկրաինացի գործարար Վադիմ Երմոլաևը և նրան ուղեկցող կինը։ Երմոլաևը մշտապես բնակվել է Մոնակոյում, իսկ 2023 թվականի դեկտեմբերից ընդգրկված է Ուկրաինայի ազգային անվտանգության և պաշտպանության խորհրդի սահմանած պատժամիջոցների ցանկում։ Նա 2019 թվականին հրաժարվել էր Ուկրաինայի քաղաքացիությունից և ստացել Կիպրոսի քաղաքացիություն։