Ռուսաստանի ֆոնդային շուկան վերականգնվել է․ Մոսկվայի բորսայի ինդեքսը կրկին գերազանցել է 2400 կետը

Մոսկվայի բորսայի ինդեքսը հունիսի 30-ի առևտրի ընթացքում գերազանցել է 2400 կետը՝ վերականգնելով նախորդ շաբաթվա անկումը, երբ ցուցանիշը նվազել էր մինչև մոտ 2200 կետ։ Այս մասին հայտնում են շուկայի տվյալները։

Նշվում է, որ ռուսական ֆոնդային շուկան արդեն երրորդ օրն անընդմեջ աճ է գրանցում՝ տվյալ պահին ավելանալով շուրջ 2 տոկոսով և հասնելով մոտ 2396,5 կետի։ Փորձագետների գնահատմամբ՝ ներկայիս աճը հիմնականում պայմանավորված է նախորդ «վաճառքային ճնշումից» հետո տեղի ունեցող տեխնիկական վերականգնմամբ, այլ ոչ թե կայուն աճի միտումով։

«Ֆինամ»-ի ռազմավարության տնօրեն Յարոսլավ Կաբակովի խոսքով՝ շուկայի վերականգնումը դեռ չի նշանակում միտման փոփոխություն, քանի որ պահպանվում են աշխարհաքաղաքական անորոշությունները, Ռուսաստանի Կենտրոնական բանկի զգուշավոր քաղաքականությունը և թույլ մակրոտնտեսական տվյալները։ Նրա կարծիքով՝ կայուն աճ հնարավոր կլինի միայն նավթի գների վերականգնման, ռուբլու արժեզրկման կամ ԿԲ-ի քաղաքականության մեղմացման դեպքում։