Հոգեբանը զգուշացրել է «նիթինգի» վտանգների մասին

Ռուսաստանում տարածում է գտնում «նիթինգ» կոչվող վճարովի ծառայությունը, որի ընթացքում մասնագետը պարզապես լսում է մարդու բողոքներն ու դժգոհությունները՝ առանց խորհուրդներ կամ գնահատականներ տալու։ Այս ֆոնին հոգեբան Մարիաննա Աբրավիտովան զգուշացրել է հնարավոր հոգեբանական հետևանքների մասին՝ Life.ru-ի հետ զրույցում։

Մասնագետի խոսքով՝ նման ձևաչափի պահանջարկը պայմանավորված է մարդկանց մոտ բաց և անվտանգ հաղորդակցության միջավայրի պակասով։ Ծառայության ընթացքում հաճախորդը կարող է ազատ արտահայտվել՝ առանց քննադատության կամ ուղղորդման, ինչը որոշ մարդկանց համար կարճաժամկետ թեթևացում է ապահովում։

Սակայն հոգեբանը նշել է, որ կան նաև բացասական կողմեր․ հաճախակի դիմելու դեպքում կարող է ձևավորվել կախվածություն բողոքելու գործընթացից։ Արդյունքում մարդը սկսում է ավելի շատ կենտրոնանալ խնդիրների դրամատիզացման վրա, քան դրանց լուծման, ինչը կարող է խորացնել անօգնականության զգացումը։ Մասնագետը խորհուրդ է տալիս հոգեբանական լուրջ դժվարությունների դեպքում դիմել պրոֆեսիոնալ թերապիայի։