Ուելսի արքայադուստրը 24 ժամում բարձրացել է Մեծ Բրիտանիայի 3 ամենաբարձր գագաթները՝ քաղցկեղի դեմ պայքարի համար միջոցներ հավաքելու նպատակով

Ուելսի արքայադուստր Քեթրինը (Քեյթը) շաբաթավերջին հաջողությամբ ավարտել է Մեծ Բրիտանիայի հայտնի «Երեք գագաթների մարտահրավերը» (Three Peaks Challenge)՝ աջակցելու այն հիվանդանոցին, որտեղ երկու տարի առաջ քաղցկեղի բուժում էր ստացել։

Արքայադուստրը հայտնել է, որ մասնակցել է այս դիմացկունության փորձությանը՝ աջակցելու The Royal Marsden Cancer Charity-ին՝ Լոնդոնի Չելսի շրջանում գործող մասնագիտացված ուռուցքաբանական կենտրոնի բարեգործական հիմնադրամին։ Մարտահրավերը ենթադրում է 24 ժամվա ընթացքում բարձրանալ Անգլիայի, Շոտլանդիայի և Ուելսի ամենաբարձր գագաթները։

«Շատերն են հարցրել, թե ինչու եմ մասնակցում այս մարտահրավերին։ Մասամբ դա անձնական է. ես անչափ շնորհակալ եմ, որ այստեղ եմ և բավական ուժեղ եմ այս լեռները հաղթահարելու համար»,- տեսաուղերձում նշել է Քեյթը։

Նրա խոսքով՝ նախաձեռնության գլխավոր նպատակը ոչ միայն անձնական պատմությունն է, այլև ցանկությունը՝ աջակցելու և գնահատելու այն հսկայական աշխատանքը, որն իրականացվում է Մեծ Բրիտանիայում քաղցկեղի դեմ պայքարի ոլորտում։

44-ամյա Քեյթը 2024 թվականի մարտին հայտնել էր, որ իր մոտ քաղցկեղ է ախտորոշվել և սկսել է քիմիաթերապիայի կուրսը։ Այդ հայտարարությունը հնչել էր խոշոր որովայնային վիրահատությունից երկու ամիս անց։ Գրեթե մեկ տարի անց նա տեղեկացրել էր, որ հիվանդությունն անցել է ռեմիսիայի փուլ։

Այդ ժամանակից ի վեր արքայադուստրը աստիճանաբար վերադարձել է իր թագավորական պարտականություններին։ Նա ակտիվորեն ներգրավվել է The Royal Marsden-ի գործունեության աջակցման և քաղցկեղով ապրող մարդկանց օգնելու նախաձեռնություններում։ Անցյալ տարի Քենսինգթոնի պալատը հայտարարեց, որ Քեյթը և նրա ամուսինը՝ արքայազն Ուիլյամը, համատեղ նշանակվել են հիմնադրամի հովանավորներ։ Այս մասին հայտնում է CNN-ը: