Ստեղծվել են բազմաֆունկցիոնալ հանրային տարածքներ՝ կրթության, մշակույթի բաղադրիչներով

ԿԳՄՍ նախարարի տեղակալ Արթուր Մարտիրոսյանը ներկա է եղել «Դիմակայունություն ի սկզբանե» ծրագրի «Տեղական առաջնորդությունը, գործընկերությունը և ազդեցությունը» խորագրով միջոցառմանը:

«Դիմակայունություն ի սկզբանե» ծրագիրն իրականացրել է ՄԱԶԾ Հայաստանը (ՄԱԿ-ի զարգացման ծրագիր)՝ Սերբիայի Հանրապետության կառավարության ֆինանսական աջակցությամբ և ՀՀ տարածքային կառավարման և ենթակառուցվածքների նախարարության հետ գործընկերությամբ 2024-2026 թթ․։ Ծրագրի շրջանակում Մասիս, Իջևան, Վաղարշապատ, Փամբակ, Արենի համայնքներում ստեղծվել են բազմաֆունկցիոնալ հանրային տարածքներ, որոնցում կարող են իրականացվել կրթական, մշակութային, երիտասարդական, մարզական և ժամանցային ծրագրեր՝ փորձարկելով համայնքային ծառայությունների նորարարական մոդելներ։ Ծրագրի նպատակն է նպաստել համայնքների դիմակայունության բարձրացմանը՝ աջակցելով բռնի տեղահանված անձանց ընդունող, ինչպես նաև վերջին ջրհեղեղներից տուժած համայնքներին։

Ողջունելով ներկաներին՝ ԿԳՄՍ նախարարի տեղակալ Արթուր Մարտիրոսյանը հատկապես կարևորել է որևէ տեսակի հումանիտար աղետի դիմակայմանն ուղղված ջանքերի համադրումը տվյալ ոլորտներում երկրի զարգացման օրակարգին:

Այս համատեքստում Արթուր Մարտիրոսյանն առանձնակի շեշտել է բազմաֆունկցիոնալ տարածքների դերը՝որպես համայնքահեն և ներառական ծառայություններ մատուցող կենտրոնների. «Պետության համար առանցքային են լրացուցիչ ու շարունակական, արտադպրոցական կրթության զարգացումը, մշակութային և ինտելեկտուալ ժամանցի կազմակերպումը, երիտասարդական տարբեր նախաձեռնություններին աջակցությունը՝ երիտասարդների ներուժի բացահայտմամբ ու առաջմղմամբ: Այս համատեքստում Հայաստանի տարբեր բնակավայրերում ձևավորված բազմաֆունկցիոնալ կենտրոնները շարունակաբար կնպաստեն ոչ միայն բռնի տեղահանվածների խնդիրների լուծմանն ու նրանց ինտեգրմանը հանրային կյանքին, այլև տվյալ համայնքներում ոլորտային քաղաքականությունների ակտիվ առաջմղմանը»:

ԿԳՄՍ նախարարի տեղակալը շնորհակալություն է հայտնել Սերբիայի Հանրապետությանը՝ խնդիրների հասցեագրման շրջանակում Հայաստանի Հանրապետությանն աջակցելու համար: Արթուր Մարտիրոսյանը հիշեցրել է, որ ԿԳՄՍ նախարարությունը հանդիսանում է հայ-սերբական միջկառավարական խորհրդում հայկական կողմի ներկայացուցիչը, ինչը, ըստ նրա, կարևոր բաղադրիչ է միջպետական հարաբերությունների հետագա զարգացման և ամրապնդման առումով։ Նա շնորհակալություն է հայտնել բոլոր գործընկերներին համատեղ ջանքերով ծրագրի կյանքի կոչման համար՝ կարևորելով դրա շարունակականության ապահովումը:

Ելույթներով հանդես են եկել ՀՀ տարածքային կառավարման և ենթակառուցվածքների նախարարի տեղակալ Առնակ Ավետիսյանը, Հայաստանում Սերբիայի դեսպան Տատյանա Պանայոտովիչ-Ցվետկովիչը, ՄԱԶԾ մշտական ներկայացուցիչ Նաթիա Նացվլիշվիլին, պաշտոնատար այլ անձինք:

Միջոցառմանը ներկայացվել են ծրագրի ձեռքբերումները, համայնքների փորձը: Առանձնակի արժևորվել է տեղական ինքնակառավարման մարմինների, պետական հաստատությունների և զարգացման գործընկերների ներդրումը դիմակայուն և ներառական տեղական զարգացման խթանման գործում։