Մեկնարկել են մարզերի դպրոցների ենթակայության փոփոխության վերաբերյալ քննարկումները

«Հանրակրթության մասին» օրենքում կատարված փոփոխություններով նախատեսվում է, որ 2026 թվականի սեպտեմբերի 1-ից մարզային ենթակայության հանրակրթական ուսումնական հաստատությունները, իսկ 2027 թվականի սեպտեմբերի 1-ից՝ Երևանի քաղաքապետարանի ենթակայության դպրոցները կգործեն ԿԳՄՍ նախարարության ենթակայությամբ։

Ենթակայության փոփոխության համակարգված իրականացումը և ուսումնական գործընթացի անխափան շարունակականությունն ապահովելու նպատակով ԿԳՄՍ նախարարությունը մեկնարկել է մարզային խորհրդակցությունների շարք, որի առաջին հանդիպումները տեղի են ունեցել այսօր Կոտայքի և Գեղարքունիքի մարզերում։

Խորհրդակցությունները վարել է ԿԳՄՍ նախարարի տեղակալ Արաքսիա Սվաջյանը: Ներկա են եղել Հանրակրթության վարչության պետ Թամարա Սարգսյանը, ինչպես նաև Կոտայքի և Գեղարքունիքի մարզային կրթության վարչությունների պատասխանատուները, դպրոցների տնօրենները, վարչատնտեսական մասի համակարգողները, այլ շահագրգիռ կողմեր։

Օրակարգի առանցքային հարցը սեպտեմբերից սպասվող դպրոցների ենթակայության փոփոխությունն էր, ինչպես նաև վարչատնտեսական գործառույթի՝ մարզերին փոխանցումը:

Խորհրդակցությունների ընթացքում նախարարի տեղակալ Արաքսիա Սվաջյանը ներկայացրել է դպրոցների ենթակայության փոփոխության իրականացման փուլերը, ժամանակացույցը և առաջիկա անելիքները։ Ներկայացնելով կառավարման համակարգի այս բարեփոխումը՝ նա նշել է, որ «Հանրակրթության մասին» ՀՀ օրենքում իրականացված փոփոխությամբ սահմանված է, որ առաջիկա սեպտեմբերից մարզերի դպրոցների բովանդակային կառավարման համակարգման գործառույթը կվերապահվի ԿԳՄՍ նախարարությանը, իսկ վարչատնտեսական գործառույթն ամբողջությամբ կփոխանցվի մարզպետարաններին: Տնօրենի ընտրության ընթացակարգը, ըստ նախարարի տեղակալի, մնում է անփոփոխ․ հավակնորդները կներկայացնեն զարգացման ծրագիր, որը կանցնի փորձաքննություն և դրական եզրակացություն ստանալու դեպքում կնշանակվի հարցազրույց, ինչի արդյունքում էլ կկատարվի նշանակումը։ Դպրոցների վարչատնտեսական համակարգողների՝ ներառյալ ավագ դպրոցների ընտրությունը, այսուհետ կիրականացնեն մարզպետարանները:

«Այս փոփոխության նպատակը միասնական, հավասար, նվազագույն չափանիշների ապահովումն է բոլոր դպրոցներում։ Պլանավորում ենք միասնական, կենտրոնացված կառավարումն իրականացնել փուլային. համայնքները քայլ-քայլ կսկսեն ավելի ակտիվ դերակատարում ունենալ»,- ասել է Արաքսիա Սվաջյանը։

Նա նաև տեղեկացրել է, որ ավելացող աշխատանքի ծավալը հաշվի առնելով՝ նախարարությունում կներդրվի մարզային համակարգողների ինստիտուտը: Ըստ այդմ՝ մարզային համակարգողներն ակտիվ կապի մեջ կլինեն դպրոցների հետ՝ պարբերաբար նաև այցեր իրականացնելով և տեղում ծանոթանալով իրավիճակին և առկա խնդիրներին:

Խորհրդակցության ընթացքում միաժամանակ քննարկվել են՝

գործառույթների փոխանցման առանձնահատկությունները,

ֆինանսավորման և թվայնացման համակարգերում նախատեսվող փոփոխությունները,

տնօրենների և վարչատնտեսական համակարգողների նշանակման կարգը և գործատուի փոփոխության վերաբերյալ տնօրենների ծանուցման կարգը,

աշխատանքային պայմանագրերի վերակնքման ընթացակարգը,

դպրոցների անվանափոխության և կանոնադրությունների փոփոխման իրավական ընթացակարգերը,

վարչատնտեսական և բովանդակային հարցերով դիմումների ներկայացմանը վերաբeրող մի շարք հարցեր։

Նախարարի տեղակալ Արաքսիա Սվաջյանն անդրադարձել մասնակիցների բարձրացրած հարցերին, տվել անհրաժեշտ պարզաբանումներ և ընդգծել, որ խորհրդակցությունների նպատակն է ապահովել ենթակայության փոփոխության միասնական և համակարգված իրականացումը, կանխատեսել ու հասցեական լուծումներ տալ հնարավոր կազմակերպական խնդիրները, ինչպես նաև ամրապնդել նախարարության, մարզպետարանների և հանրակրթական ուսումնական հաստատությունների միջև արդյունավետ համագործակցությունը։

Նոր ուսումնական տարվա կրթական գործընթացի պատշաճ կազմակերպման, փոփոխությունների վերաբերյալ իրազեկվածության ապահովման նպատակով հուլիսյան խորհրդակցությունները կշարունակվեն հանրապետության մյուս բոլոր մարզերում։ Ավանդաբար իրականացվող օգոստոսյան խորհրդակցությունները ևս նախատեսված են սահմանված ժամանակահատվածում: