Apple-ը 2027 թվականին կթողարկի ամբողջովին նոր Apple Watch

Apple-ը պատրաստվում է խելացի ժամացույցների դիզայնի խոշոր թարմացման, որը հնարավոր է թողարկվի 2027 թվականին: MacRumors-ի հաղորդմամբ՝ հղում անելով Instant Digital-ի ներքին աղբյուրին, սարքը կունենա նոր ժապավենի ամրացման համակարգ, որը կարող է ներկայիս աքսեսուարները անհամատեղելի դարձնել ապագա մոդելների հետ։

Աղբյուրի փոխանցմամբ՝ Apple-ը կփոխի ժապավենի ամրացման եղանակը ժամացույցի պատյանին՝ ազատելով ներքին տարածք ավելի մեծ մարտկոցի համար: Ներքին աղբյուրը նաև խորհուրդ է տվել 2027 թվականին Apple Watch գնել պլանավորող օգտատերերին նախապես չգնել լրացուցիչ ժապավեններ, քանի որ թարմացված պատյանի դիզայնը կարող է վերացնել առկա ամրացման համակարգը։

MacRumors-ը հիշեցնում է, որ Apple Watch X մոդելի մասին լուրերը շրջանառվել են դեռևս 2023 թվականին: Այդ ժամանակ հաղորդվում էր, որ Apple-ը իր 10-ամյակի կապակցությամբ պատրաստվում էր ժամացույցների շարքի խոշոր թարմացման, որը ներառում էր նոր մագնիսական ժապավենի ամրացում, ավելի բարակ պատյան և microLED էկրան: Սակայն, փոխարենը, ընկերությունը թողարկեց Apple Watch Series 10-ը՝ պահպանելով համատեղելիությունը առկա ժապավենների հետ և կատարելով միայն աննշան դիզայնի փոփոխություններ: Այժմ, ինչպես նշում է հրատարակությունը, կարծես թե վերաձևավորումը չի չեղարկվել, այլ հետաձգվել է։

MacRumors-ի տվյալներով՝ Apple Watch Series 12-ը, որի թողարկումը նախատեսվում է այս տարի, կպահպանի Series 10-ում ներկայացված դիզայնը՝ ավելի բարակ կորպուսով, ավելի մեծ էկրանով և մետաղական հետևի վահանակով՝ ներկառուցված անտենայով։