Ֆրանսիայում հայտարարվել է 2027 թվականի նախագահական ընտրությունների ամսաթիվը

Ֆրանսիայի կառավարության պաշտոնական ներկայացուցիչ Մոդ Բրեժոնը հայտարարել է, որ երկրի նախագահական ընտրությունների առաջին փուլը կանցկացվի 2027 թվականի ապրիլի 18-ին։ Այս մասին հաղորդում է ՏԱՍՍ-ը։

Նրա խոսքով՝ ընտրությունների օրը հաստատվել է քաղաքական կուսակցությունների հետ անցկացված խորհրդակցություններից հետո։ Եթե առաջին փուլում թեկնածուներից ոչ մեկը չստանա անհրաժեշտ աջակցությունը, երկրորդ փուլը կկայանա 2027 թվականի մայիսի 2-ին։

Ավելի վաղ ԱՄՆ նախագահ Դոնալդ Թրամփը հայտարարել էր, որ Ֆրանսիայի նախագահ Էմանուել Մակրոնը շուտով կլքի իր պաշտոնը։ Իր հերթին Մակրոնը նշել էր, որ ներկայիս աշխարհաքաղաքական իրավիճակում Եվրոպան պետք է առաջին հերթին հույսը դնի սեփական ուժերի վրա։