Տաճարից գողություն կատարած տղամարդը հայտարարել է, թե Բուդդան իրեն «թույլատրել է» վերցնել իրերը

Թաիլանդում ոստիկանությունը ձերբակալել է մի տղամարդու, որը Բանգկոկի հայտնի Վաթ Փհո բուդդայական տաճարից գողացել էր արույրե մոմակալներ։ Ինչպես հայտնում է The Thaiger-ը, կասկածյալը հարցաքննության ժամանակ պնդել է, որ Բուդդայի արձանի ժպիտը ընկալել է որպես իրերը վերցնելու թույլտվություն։

Դեպքը տեղի է ունեցել հունիսի 28-ին։ Տաճարում հերթապահող ոստիկանները կասկածելի վարքագիծ դրսևորող տղամարդուն կանգնեցրել և ստուգել են նրա պայուսակը, որտեղ հայտնաբերվել են գողացված մոմակալները։ Սկզբում նա հայտնել է, թե ցանկանում էր դրանք նվիրաբերել մեկ այլ տաճարի, սակայն հետաքննության ընթացքում պարզվել է, որ իրական նպատակը դրանք վաճառելն էր։

Տղամարդուն մեղադրանք է առաջադրվել գողության հոդվածով։ Հատկանշական է, որ Վաթ Փհո տաճարը Բանգկոկի ամենահին և ամենահայտնի բուդդայական սրբավայրերից է, որը կառուցվել է XII դարում և ընդգրկված է ՅՈՒՆԵՍԿՕ-ի Համաշխարհային ժառանգության ցանկում։