Լրատվամիջոցները հաշվարկել են Գրիգորի Լեպսի անշարժ գույքի արժեքը

Ռուս երգիչ Գրիգորի Լեպսին պատկանող անշարժ գույքի ընդհանուր արժեքը գերազանցում է 1 միլիարդ ռուբլին։ Այդ մասին հայտնում է «Звездач» Telegram ալիքը՝ ներկայացնելով արտիստի գույքային ակտիվները։

Հրապարակման համաձայն՝ Լեպսին պատկանում են Մոսկվայում գտնվող մի քանի բնակարան, առանձնատուն Նովայա Ռիգայի շրջանում, ինչպես նաև 4,2 հեկտար հողատարածք Տվերի մարզում՝ Վոլգա գետի և Ստարիցկու վանքի հարևանությամբ։ Ամենաթանկ ակտիվներից մեկը Սավվինսկայա ափամերձ փողոցում գտնվող շուրջ 300 քմ մակերեսով բնակարանն է, որի արժեքը գնահատվում է մոտ 390 միլիոն ռուբլի։

Բացի այդ, երգչին է պատկանում շքեղ առանձնատուն Պոզդնյակովո գյուղում, որը նախկինում վաճառքի էր հանվել շուրջ 550 միլիոն ռուբլով։ Առանձնատունն ունի յոթ ննջասենյակ, տասը լոգասենյակ, գրադարան, ձմեռային այգի, լողավազան, սպա-գոտի, սաունա, ձայնագրման ստուդիա և երկու մեքենայի համար նախատեսված ավտոտնակ։ Ավելի վաղ նշվում էր, որ գույքի վաճառքը կապված էր Լեպսի սպասվող ամուսնության հետ, սակայն այդ հարաբերություններն ավարտվել են։