Դամասկոսի կենտրոնում գտնվող սրճարանում պայթյունի հետևանքով զոհվել է 4, վիրավորվել՝ 11 մարդ

Սիրիայի մայրաքաղաք Դամասկոսի կենտրոնում գտնվող սրճարանում պայթյունի հետևանքով չորս մարդ է զոհվել, ևս 11 մարդ ստացել է վնասվածքներ, հաղորդում է Sana-ն՝ հղում անելով սիրիական բժշկական և ներքին աղբյուրներին։

Առողջապահության նախարարության շտապօգնության և արտակարգ բժշկության ծառայության տնօրեն դոկտոր Ահմադ ալ-Բաքքուրի տվյալներով՝ 14 տուժած դեպքի վայրից՝ ան-Նասր փողոցից, տարհանվել են ալ-Մուջթահիդ հիվանդանոց։ Նրանցից չորսը մահացել են, տասը՝ վիրավորվել։ Եվս մեկ տուժած տեղափոխվել է Սիրիական Կարմիր Մահիկի հիվանդանոց։

Սիրիայի ներքին գործերի նախարարությունը հայտարարել է, որ պայթյունը առաջացել է սրճարանի ներսում տեղադրված ինքնաշեն պայթուցիկ սարքի պատճառով։ Միջադեպից հետո անվտանգության ուժերը անմիջապես գործողություն են սկսել դեպքի վայրում։

Պայթյունի վայր են ուղարկվել ներքին անվտանգության ստորաբաժանումներ և շտապօգնության բրիգադներ։ Տարածքը շրջափակվել է, իրականացվել է տուժածների տարհանում, և ապահովվել են անվտանգության միջոցառումներ՝ նոր միջադեպերը կանխելու համար։

Իշխանությունները շարունակում են պայթյունի հանգամանքների հետաքննությունը։