Ես Թուրքիայում համալսարան չեմ գնացել, ես Թուրքիայում ոչինչ չեմ սովորել. Ռուբինյան (տեսանյութ)

Ռուբեն Ռուբինյանը մեկնաբանել է Թուրքիայում իր գտնվելու ժամանակահատվածի, վերապատրաստման կամ համալսարան հաճախելու վերաբերյալ հարցն ու շրջանառվող լուրերը:

Ազգային ժողովի փոխնախագահը հայտարարել է, որ լսել է բազմաթիվ տխմարություններ, որոնց մասին վերջերս խոսում են հիմնականում կալուգացի օլիգարխի թիմակիցները։ Նա նշել է, որ այս թեմային անդրադարձել է դեռ ութ, ապա հինգ տարի առաջ, բայց խնդիր չունի նորից կրկնելու։ Ռուբինյանը սուտ է որակել այն պնդումը, թե ինքը սովորել է Թուրքիայում և իր ուսանողական տարիներն անցկացրել է այնտեղ։ 

Պատգամավորը հստակեցրել է, որ ուսանողական տարիներն անցկացրել է սկզբից Հայաստանում՝ 2006-2010 թվականներին սովորելով ԵՊՀ-ում, այնուհետև 2010-2011 թվականներին մագիստրատուրան ավարտել է Լոնդոնում, իսկ 2011-2012 թվականներին երկրորդ մագիստրատուրան՝ Լեհաստանում։ 

Նա շեշտել է, որ Թուրքիայում համալսարան չի գնացել, ոչինչ չի սովորել, թուրքական դիպլոմ չունի, և չկա որևէ մարդ, ով իրեն դաս է տվել Թուրքիայում։ 

ԱԺ փոխնախագահը հայտնել է, որ 2016-2017 թվականներին հինգ ամիս մասնակցել է Հրանտ Դինքի հիմնադրամի ծրագրին, որի անվանումն էր «Սահմանից անդին»։