Իրանում տեղի կունենա երկրի գերագույն առաջնորդ Ալի Խամենեիի հուղարկավորությունը

Օտարերկրյա պատվիրակությունները ժամանում են Թեհրան, որտեղ ուրբաթ՝ հուլիսի 3-ին, տեղի կունենա Իրանի գերագույն առաջնորդ Ալի Խամենեիի հիշատակին նվիրված միջազգային արարողություն: 2026 թվականի փետրվարի 28-ին ԱՄՆ-ի աջակցությամբ իսրայելական ավիահարվածի հետևանքով սպանված այաթոլլայի մարմինը հողին է հանձնվում չորս ամիս անց: Իրանի իշխանությունները հայտարարել են երկրի պատմության մեջ ամենամեծ պետական ​​հուղարկավորության մասին՝ գրում է RTVI-ը։

Ռահբարի հրաժեշտի արարողությունները տեղի կունենան հուլիսի 4-8-ը Իրանի և Իրաքի մի շարք քաղաքներում, որտեղ գտնվում են շիաների գլխավոր սրբավայրերը, իսկ հուղարկավորությունը նախատեսված է հուլիսի 9-ին՝ նրա հայրենի Մաշհադում։

Իրանի ներքին գործերի փոխնախարար և հուղարկավորության կազմակերպման շտաբի ղեկավար Ալի Աքբար Փուրջամշիդիանի խոսքով՝ արարողությունը կսկսվի Թեհրանում՝ հուլիսի 3-ին՝ օտարերկրյա առաջնորդների, պաշտոնյաների և հոգևորականների մասնակցությամբ: Այն տեղի կունենա Իսլամական հեղափոխության առաջնորդ այաթոլլա Ռուհոլլա Խոմեյնիի անունը կրող Մոսալլա աղոթքի համալիրում՝ մզկիթում, որտեղ անցկացվում են պետական ​​սգո արարողությունները։

Թեհրանը պնդում է, որ ավելի քան 30 երկրի պատվիրակություն և ավելի քան 90 հոգևոր առաջնորդ հայտնել են արարողությանը մասնակցելու  պատրաստակամություն։ Նրանց թվում են՝ Իրաքի նախագահ Նիզար Ամիդին և վարչապետ Ալի ալ Զեյդին, Պակիստանի վարչապետ Շեհբազ Շարիֆը, Վրաստանի նախագահ Միխեիլ Կավելաշվիլին, Տաջիկստանի նախագահ Էմոմալի Ռահմոնը և Հայաստանի վարչապետ Նիկոլ Փաշինյանը, Ադրբեջանի Միլի մեջլիսի  խոսնակ Սահիբա Գաֆարովան, փոխվարչապետ Շահին Մուստաֆաևը, Նախիջևանի Ինքնավար Հանրապետության ղեկավար Ջաբար Մուսաևն ու այլ պաշտոնյաներ։

Fox News-ի տվյալով՝ Իրանի նախագահ Մասուդ Փեզեշքիանն անձամբ է հրավիրել Հնդկաստանի վարչապետ Նարենդրա Մոդիին, սակայն Նյու Դելին «կուղարկի ավելի ցածր մակարդակի պատվիրակություն»։ Իրանական լրատվամիջոցների տվյալներով՝ պատվիրակության կազմում կլինեն փոխարտգործնախարար Պաբիտրա Մարգարիտան և Բիհարի նահանգապետ Սայեդ Աթա Հասնայնը։ Չինաստանը կներկայացնի Ազգային ժողովրդական կոնգրեսի մշտական ​​կոմիտեի փոխնախագահ (ՉԺՀ խորհրդարանի փոխնախագահ) Հե Վեյը։ Ռուսաստանը կներկայացնի Անվտանգության խորհրդի փոխնախագահ Դմիտրի Մեդվեդևը։

Թեհրանում սպասում են պատվիրակություններ Կատարից, Լիբանանից, Սիրիայից, Վենեսուելայից, Բելառուսից և Հյուսիսային Կորեայից, ինչպես նաև ՀԱՄԱՍ-ի, «Հըզբոլլահի», Եմենի հութիների և Իրաքի շիա աշխարհազորայինների ներկայացուցիչներին։

Իրանի արտաքին գործերի նախարարության խոսնակ Էսմայիլ Բաղաեին հայտարարել է, որ Թեհրանի դեմ ռազմական գործողությանն աջակցած երկրների, նաև Եվրամիության առաջնորդները չեն հրավիրվել հուղարկավորության արարողությանը։

Ըստ պարբերականի՝ առաջիկա հուղարկավորության հիմնական ինտրիգներից մեկն այն է, թե արդյոք սպանվածի որդին և իրավահաջորդը՝ 56-ամյա Մոջթաբա Խամենեին, կմասնակցի՞ արարողությանը։ Նա Իրանի նոր գերագույն առաջնորդ է ընտրվել մարտի 8-ին, բայց այդ ժամանակվանից ի վեր հանրության առաջ չի երևացել։