Ռուսաստանում քննարկել են միգրացիոն նոր մարտահրավերներն ու Կենտրոնական Ասիայից հոսքերը

Նիժնի Նովգորոդում անցկացված կլոր սեղանի ընթացքում փորձագետները քննարկել են ժամանակակից միգրացիոն գործընթացներն ու այն մարտահրավերները, որոնց առաջիկա տարիներին կարող են բախվել Ռուսաստանը և Կենտրոնական Ասիայի երկրները։ Այդ մասին հայտնում է РИАМО-ն։

Քննարկման հիմնական թեմաներից մեկը Կենտրոնական Ասիայի երկրներից միգրացիան էր։ Մասնակիցների գնահատմամբ՝ դրա վրա ազդում են բնակչության աճը, բարձր գործազրկությունը, ինչպես նաև տարածաշրջանում կլիմայական և բնական պայմանների փոփոխությունները։ Փորձագետ Լիա Ֆարրախովայի խոսքով՝ վերջին տասնամյակներին տարածաշրջանում ջրային ռեսուրսների պակասը մեծացրել է ճնշումը գյուղատնտեսության և աշխատաշուկայի վրա, ինչը կարող է նպաստել կլիմայական միգրացիայի աճին։

Փորձագետները նաև քննարկել են միգրացիոն վերահսկողության թվայնացման, ներգաղթյալների ինտեգրման և հետխորհրդային տարածքում միգրացիոն միտումների հարցերը։ Քննարկման ավարտին ներկայացվել են առաջարկություններ, որոնք վերաբերում են միգրանտների անվտանգ ինտեգրմանը և Ռուսաստանի ու Մեծ Եվրասիայի երկրների միջև հումանիտար համագործակցության զարգացմանը։ Ավելի վաղ հաղորդվել էր, որ Ռուսաստանում օտարերկրացիների թիվը մեկ տարվա ընթացքում նվազել է շուրջ 700 հազարով՝ հասնելով 6,1 միլիոնի։