Windows Central-ը բացահայտել է Microsoft-ի՝ արհեստական բանականության վրա հիմնված Windows-ի նոր տարբերակը

Microsoft-ը մշակել է Windows օպերացիոն համակարգի նոր, թեթևացված տարբերակ, որի աշխատանքը հիմնված է արհեստական բանականության վրա։ Այդ մասին հայտնում է մասնագիտացված Windows Central պարբերականը՝ հղում անելով ընկերությունից ստացված տեսանյութին։

Հրապարակման համաձայն՝ նոր նախագիծը կոչվում է Aion։ Այն ստեղծվել է Windows-ի հիման վրա, սակայն զրկված է ավանդական համակարգի բազմաթիվ բաղադրիչներից և ծառայություններից։ Համակարգի կենտրոնում գտնվում է Copilot արհեստական բանականության օգնականը, իսկ ինտերֆեյսը կառուցված է հենց դրա շուրջ։

Նշվում է, որ Aion-ը չի աջակցում սովորական Windows ծրագրերի գործարկմանը և աշխատում է միայն վեբ-հավելվածներով՝ պահանջելով մշտական ինտերնետ կապ։ Windows Central-ի խմբագիր Զաք Բոուդենի խոսքով՝ նախագիծն իսկապես մշակվել է Microsoft-ում 2024 թվականին որպես փորձարարական նախաձեռնություն, սակայն առայժմ հայտնի չէ՝ շարունակվե՞լ է արդյոք դրա զարգացումը և կդառնա՞ այն ապագա արտադրանք։