Մասնագետը նշել է, թե ինչու է հին համակարգիչը դանդաղ աշխատում և ինչպես արագացնել այն

Տեխնոլոգիական XDA պարբերականի փորձագետները ներկայացրել են մի քանի պարզ քայլ, որոնք կարող են զգալիորեն արագացնել հին համակարգչի աշխատանքը՝ առանց թանկարժեք սարքավորումներ փոխարինելու։

Մասնագետների խոսքով՝ նախ անհրաժեշտ է անջատել ոչ առաջնահերթ համակարգային գործառույթները, օրինակ՝ որոնման ինդեքսավորումը կամ Microsoft-ին ախտորոշիչ տվյալներ փոխանցող ծառայությունները։ Բացի այդ, խորհուրդ է տրվում ազատել կոշտ սկավառակի տարածքը, քանի որ եթե այն լցված է ավելի քան 90 տոկոսով, համակարգչի աշխատանքը զգալիորեն դանդաղում է։

Փորձագետները նաև խորհուրդ են տալիս մաքրել Windows-ի ավտոմատ գործարկման ցանկը՝ հեռացնելով ավելորդ ծրագրերը, որոնք միանում են համակարգչի գործարկման պահին և ծանրաբեռնում համակարգը։ Նրանք խորհուրդ են տալիս հնարավորության դեպքում համակարգիչը ամբողջությամբ անջատել, ոչ թե միայն քնի ռեժիմ տեղափոխել, ինչպես նաև պարբերաբար մաքրել համակարգային բլոկի ներսում կուտակված փոշին, քանի որ այն կարող է հանգեցնել գերտաքացման և արտադրողականության նվազման։