Ոճաբանը պատմել է, թե որ լողազգեստն է համապատասխանում մարմնի յուրաքանչյուր կառուցվածքին

Ռուս ոճաբան, Alevtini բրենդի հիմնադիր Օլեսյա Ալևտինին ներկայացրել է, թե ինչպես ընտրել լողազգեստ՝ ըստ մարմնի կառուցվածքի։ Նրա խորհուրդները հրապարակել է Life.ru-ն։

Մասնագետի խոսքով՝ «ավազե ժամացույց» կազմվածք ունեցող կանանց առավել համապատասխանում են գոտկատեղն ընդգծող բիկինիները՝ գոտիով, հակադիր գունային ներդիրներով և բարձր գոտկատեղով մոդելները։ Իսկ «տանձ» կազմվածքի դեպքում խորհուրդ է տրվում ընտրել վառ կամ ընդգծված վերնամաս, որպեսզի ուշադրությունը տեղափոխվի ազդրերից դեպի կուրծք։ Միևնույն ժամանակ նա խորհուրդ է տվել խուսափել շորտ հիշեցնող ներքևի հատվածից։

«Շրջված եռանկյունի» կազմվածք ունեցող կանանց դիզայները խորհուրդ է տալիս ընտրել վառ գույնի կամ կապերով ներքևի հատված և մուգ, պարզ ձևավորման կրծկալներ։ «Ուղղանկյուն» կազմվածքի դեպքում, ըստ նրա, գոտկատեղի տեսողական ընդգծման համար արդյունավետ են դրապիրումները, հակադիր գունային ներդիրները և push-up ձևավորումները, իսկ «խնձոր» կազմվածքի դեպքում լավագույն ընտրությունը V-աձև բացվածքով, ուղղահայաց գծերով և կողային մուգ ներդիրներով լողազգեստներն են, որոնք տեսողականորեն ձգում են ուրվագիծը։