Ախալքալաքի բնակիչները կդիմեն կառավարությանը, նամակ կուղարկեն Վրաստանի վարչապետին

Ախալքալաքի բնակիչները ստորագրահավաք են նախաձեռնել՝ դիմելով կառավարությանը՝ Ախալքալաք-Կարծախ ճանապարհի վիճակի բարելավման պահանջով։

Ինչպես հայտնում է Jnews-ը, Սուլդա գյուղի նախաձեռնող խումբը կազմել է նամակ-խնդրագիր, որը հասցեագրվելու է Վրաստանի վարչապետ Իրակլի Կոբախիձեին։ Դրանում բնակիչները խնդրում են լուծում տալ ճանապարհի ծայրահեղ վատ վիճակին՝ նշելով, որ այն արդեն երկար ժամանակ անանցանելի է դարձել և լրջորեն ազդում է տեղի բնակչության կյանքի որակի վրա։

Նամակի պատճենները նախատեսվում է ուղարկել նաև Վրաստանի ճանապարհների դեպարտամենտին և Տարածաշրջանային զարգացման ու ենթակառուցվածքների նախարարությանը։

Բնակիչները նամակում ընդգծում են, որ ճանապարհի վատ վիճակը ստեղծում է լուրջ խնդիրներ ինչպես տրանսպորտի, այնպես էլ ամենօրյա տեղաշարժի համար․

«Մենք ստիպված ենք օգտվել այս ճանապարհից, սակայն այն անընդհատ ստեղծում է ծանր անհարմարություններ։ Նրանք, ովքեր չունեն սեփական մեքենա, հաճախ չեն կարողանում հասնել մունիցիպալ կենտրոն, քանի որ անգամ տաքսիները հրաժարվում են երթևեկել այս ուղղությամբ։ Իսկ մեքենա ունեցողները պարբերաբար վնասում են իրենց ավտոմեքենաների անվադողերը և այլ մասերը»,– նշվում է նամակում։

Բնակիչները նաև ահազանգում են, որ արտակարգ իրավիճակներում շտապօգնության հասանելիությունը կարող է զգալիորեն ուշանալ։ Եթե սովորաբար օգնությունը հասնում է մոտ 15–20 րոպեում, ապա ճանապարհի անանցանելիության պատճառով այդ ժամանակը կարող է ձգվել մինչև 1.5–2 ժամ, ինչը, ըստ նրանց, ուղղակի սպառնալիք է մարդկանց առողջության և կյանքի համար։

Նամակի հեղինակների խոսքով՝ խնդիրը վերաբերում է ոչ միայն առանձին գյուղերի, այլև ողջ տարածաշրջանի բնակիչների անվտանգությանը և բարեկեցությանը։