Գերմանիայի նախկին ԱԳ նախարարը չի բացառել ԱՄՆ-ի դուրս գալը ՆԱՏՕ-ից

Գերմանիայի նախկին արտգործնախարար Յոշկա Ֆիշերը հայտարարել է, որ ԱՄՆ-ը կարող է ապագայում դուրս գալ ՆԱՏՕ-ից և կոչ է արել ուժեղացնել դաշինքի եվրոպական բաղադրիչը։ Այդ մասին հաղորդում է ՏԱՍՍ-ը։

Ֆիշերի կարծիքով՝ եթե Վաշինգտոնը լքի ՆԱՏՕ-ն, ապա կարող է նաև Եվրոպայից դուրս բերել իր միջուկային ներուժը՝ եվրոպական երկրներին թողնելով առանց ամերիկյան «միջուկային հովանոցի»։ Նա ընդգծել է, որ այդ պատճառով Եվրոպան պետք է ավելի մեծ պատասխանատվություն ստանձնի սեփական անվտանգության ապահովման հարցում։

Նախկին նախարարը նաև առաջարկել է ձևավորել եվրոպական միջուկային զսպման համակարգ՝ հիմնվելով Մեծ Բրիտանիայի և Ֆրանսիայի միջուկային զինանոցների վրա։ Ավելի վաղ ԱՄՆ նախագահ Դոնալդ Թրամփը հայտարարել էր, որ ՆԱՏՕ-ի շրջանակում ԱՄՆ-ի հարաբերությունները դաշնակիցների հետ լիովին փոխշահավետ չեն։