Չինաստանին մեղադրել են գերմանական արդյունաբերության դիրքերը թուլացնելու մեջ

Չինաստանը սկսել է Գերմանիա արտահանել ավելի շատ բարձր տեխնոլոգիական արտադրանք, քան ներմուծել այնտեղից, ինչի հետևանքով, ըստ The Wall Street Journal-ի, աճում է ճնշումը գերմանական արդյունաբերության վրա։

Հրատարակության տվյալներով՝ չինական և գերմանական արտադրանքի որակական տարբերությունն էապես նվազել է, մինչդեռ Չինաստանում արտադրված համանման ապրանքների գինը հաճախ գրեթե կրկնակի ցածր է։ Արդյունքում գերմանական ընկերությունները ստիպված են կրճատել աշխատատեղերը և արտադրության մի մասը տեղափոխել Չինաստան։

Նշվում է, որ Գերմանիայում ամեն ամիս կրճատվում է ավելի քան 10 հազար աշխատատեղ, իսկ արդյունաբերական արտադրության ծավալը 2022 թվականի փետրվարից մինչև 2026 թվականի սկիզբը նվազել է շուրջ 10 տոկոսով։ Միևնույն ժամանակ, Չինաստանից Գերմանիա արտահանման ծավալն այս տարի աճել է 17 տոկոսով՝ նախորդ տարվա համեմատ։