MWM․ Լեհաստանը հրաժարվել է Patriot համակարգեր տրամադրել ԱՄՆ-ին՝ միաժամանակ գաղտնի զինելով Ուկրաինային

Լեհաստանը մերժել է ԱՄՆ-ի խնդրանքը՝ փոխանցել Patriot հակաօդային պաշտպանության համակարգեր, սակայն միաժամանակ գաղտնի զինամթերք է մատակարարել Ուկրաինային։ Այս մասին հայտնում է Military Watch Magazine (MWM)-ը՝ հղում անելով տարածաշրջանային աղբյուրներին։

Պարբերականի տվյալներով՝ ԱՄՆ-ը դիմել էր Լեհաստանին՝ Patriot համակարգերի հրթիռներ տրամադրելու խնդրանքով՝ Իրանի հետ դիմակայության պայմաններում սեփական պաշարները համալրելու նպատակով։ Սակայն Լեհաստանի պաշտպանության նախարար Վլադիսլավ Կոսինյակ-Կամիշը հայտարարել էր, որ երկրի Patriot համակարգերը նախատեսված են բացառապես Լեհաստանի և ՆԱՏՕ-ի արևելյան թևի պաշտպանության համար, ուստի դրանք չեն փոխանցվի այլ երկրներին։

Միևնույն ժամանակ MWM-ը պնդում է, որ մարտ ամսին Վարշավան գաղտնի կերպով Ուկրաինային փոխանցել է իր օպերատիվ պահուստից հրթիռների խմբաքանակ։ Հրատարակության գնահատմամբ՝ այդ քայլով Լեհաստանի իշխանությունները Ուկրաինային աջակցությունը գերադասել են ինչպես սեփական պաշտպանական կարիքներից, այնպես էլ ԱՄՆ-ի շահերից։ Ավելի վաղ Լեհաստանի խորհրդարանի փոխխոսնակ Քշիշտոֆ Բոսակը չէր բացառել, որ նման որոշումները կարող էին ընդունվել առանց երկրի նախագահի լիարժեք համաձայնության։