Իտալիայում հայտնաբերվել է հնագույն իշխանի դամբարան՝ ներսում պահպանված մարտակառքով

Իտալիայի կենտրոնական հատվածում հնագետները հայտնաբերել են մ.թ.ա. VI դարով թվագրվող հնագույն իշխանի դամբարան, որտեղ պահպանվել են երկանիվ մարտակառք և խոշոր, կնքված անոթներ։ Այդ մասին հայտնում է La Brújula Verde-ն։

Դամբարանը հայտնաբերվել է Սիրոլոյի շրջանում՝ Կոպերտո լեռան ստորոտում իրականացված պեղումների ժամանակ։ Ըստ հետազոտողների՝ այն պատկանել է պիցենների ցեղի բարձրաստիճան ռազմիկի։ Հուղարկավորման համալիրը շրջապատված է եղել ոչ թե ավանդական խրամատով, այլ փայտե պարիսպով, ինչը տվյալ տարածաշրջանի համար եզակի ճարտարապետական լուծում է։ Կենտրոնական դամբարանում հայտնաբերվել են ամբողջական վիճակում թաղված մարտակառքի մնացորդներ, որը համարվում է իշխանական բարձր կարգավիճակի խորհրդանիշ։

Դամբարանից նաև հայտնաբերվել են սաղավարտ, մարտական կացին, այլ զենքեր, ինչպես նաև բրոնզե խոշոր անոթներ՝ կերամիկական կափարիչներով։ Դրանցում պահպանվել են օրգանական մնացորդներ, կենդանիների ոսկորներ և կերամիկայի բեկորներ, որոնք, ըստ գիտնականների, կարող էին կապված լինել թաղման արարողության կամ հանգուցյալի պատվին կազմակերպված հոգեհացի հետ։ Կենտրոնական գերեզմանի հարևանությամբ հայտնաբերվել է նաև կնոջ դամբարան՝ լավ պահպանված գործվածքներով, զարդերով և մետաղական տարրերով կոշիկների մնացորդներով, ինչը վկայում է նրա բարձր հասարակական կարգավիճակի մասին։