Brent-ը թանկացել է մինչև 72,56 դոլար մեկ բարելի համար

Նավթի գները աճում են նախորդ օրվա աննշան նվազումից հետո, իսկ շուկայի ուշադրության կենտրոնում շարունակում է մնալ իրավիճակը Մերձավոր Արևելքում։

Brent-ի սեպտեմբերյան ֆյուչերսները Լոնդոնի ICE Futures բորսայում թանկացել են 0,57 դոլարով (0,79%)՝ հասնելով 72,56 դոլարի մեկ բարելի համար։ Երկուշաբթի Brent-ը էժանացել էր 0,13 դոլարով (0,2%)՝ մինչև 71,99 դոլար մեկ բարելի համար։

WTI-ի օգոստոսյան ֆյուչերսները Նյու Յորքի ապրանքային բորսայի՝ NYMEX-ի, էլեկտրոնային առևտրի ընթացքում թանկացել են 0,52 դոլարով (0,76%)՝ մինչև 69,07 դոլար մեկ բարելի համար։ Նախորդ նստաշրջանի արդյունքներով պայմանագիրը էժանացել էր 0,14 դոլարով (0,2%)՝ մինչև 68,55 դոլար մեկ բարելի համար։