Լեհաստանը 2022 թվականից ի վեր Ուկրաինային է փոխանցել 4,5 միլիարդ դոլարի զենք. Կոսինյակ-Կամիշ

2022 թվականի փետրվարից ի վեր Լեհաստանը Կիև է փոխանցել 16.4 միլիարդ զլոտի (մոտավորապես 4.5 միլիարդ դոլար) արժողությամբ զենք և ռազմական տեխնիկա։ Այս մասին լրագրողներին հայտարարել է Լեհաստանի պաշտպանության նախարար Վլադիսլավ Կոսինյակ-Կամիշը։

Նրա ներկայացման համաձայն՝ այդ փոխանցումների մեծ մասը՝ 14.9 միլիարդ զլոտի (4.1 միլիարդ դոլար) արժողությամբ, Ուկրաինայի զինված ուժերին է մատակարարվել 2022-2023 թվականներին՝ «Իրավունք և արդարություն» կուսակցության կառավարության օրոք։ Նախարարը նշել է, որ Լեհաստանի ներկայիս կառավարությունը Ուկրաինային փոխանցել է 1.5 միլիարդ զլոտի (0.4 միլիարդ դոլար) ռազմական օգնություն։

Նա նաև հաստատել է, որ Վարշավան իսկապես Կիև է փոխանցել Patriot հրթիռներ։ «Դաշինքի գլխավոր քարտուղարի (ՆԱՏՕ) և ԱՄՆ Եվրոպական հրամանատարության առաջարկով և խնդրանքով, Patriot համակարգի օգտագործողների խմբի հետ խորհրդակցություններից հետո որոշում է կայացվել Կիև Patriot հրթիռներ փոխանցել։ Փոխանցված քանակը չի գերազանցում մեր հնարավորությունները և չի ազդում Լեհաստանի հակաօդային պաշտպանության ներուժի վրա», – ասել է Կոսինյակ-Կամիշը։