ՆԱՏՕ-ն գործարկել է ռազմական գնումների նոր միասնական հարթակ

ՆԱՏՕ-ի գլխավոր քարտուղար Մարկ Ռյուտեն հայտարարել է ռազմական գնումների գործընթացը պարզեցնելու և ընդլայնելու նպատակով նոր միասնական մեխանիզմի գործարկման մասին։ Նրա խոսքերը փոխանցում է Mirage-ը։

«ՆԱՏՕ-ի գլխավոր մուտք» (NATO Front Door) անվանումը ստացած նախաձեռնությունը նախատեսված է դառնալու միասնական հարթակ, որի միջոցով պաշտպանական արդյունաբերության ընկերություններն ու ձեռնարկությունները կկարողանան ավելի արդյունավետ համագործակցել դաշինքի հետ։ Ռյուտեն այդ մասին հայտարարել է Անկարայում անցկացված ոլորտային համաժողովի ընթացքում։

Նրա խոսքով՝ նոր մեխանիզմը կոչված է համակարգելու ռազմական գնումներին առնչվող բոլոր գործընթացները։ ՆԱՏՕ-ի գլխավոր քարտուղարը նաև կոչ է արել եվրոպական և ամերիկյան պաշտպանական արդյունաբերության ներկայացուցիչներին ակտիվորեն օգտվել նոր հարթակից և ընդլայնել համագործակցությունը դաշինքի հետ։

Միաժամանակ ՆԱՏՕ-ն շարունակում է անդամ երկրներին կոչ անել մինչև 2035 թվականը պաշտպանության վրա ծախսերը հասցնել ՀՆԱ-ի 5 տոկոսի։ Այս ցուցանիշին ամենամոտը ներկայումս Լեհաստանն ու Լիտվան են։ Լիտվայի նախագահ Գիտանաս Նաուսեդան ավելի վաղ զգուշացրել էր, որ եթե մյուս անդամ երկրները չավելացնեն ռազմական ծախսերը, դա կարող է բացասաբար անդրադառնալ դաշինքի ապագայի վրա։