ՌԴ-ում մշակվել են փոքր միջուկային ռեակտորներ՝ Արկտիկայի և տիեզերական առաքելությունների համար

Ռուսաստանում մշակվել են փոքր չափերի միջուկային ռեակտորներ, որոնք նախատեսված են Արկտիկայի պայմաններում և հեռավոր տիեզերական առաքելություններում կիրառելու համար։ Այդ մասին «Իննոպրոմ-2026» միջազգային համաժողովում հայտարարել է «Գիտության սահմաններ» գիտատեխնիկական գիլդիայի գլխավոր տնօրեն Իլյա Չեխը, փոխանցում է ՏԱՍՍ-ը։

Նրա խոսքով՝ ռեակտորները նախագծված են ծովային բեռնարկղի ձևաչափով և ունեն 170 մեգավատ էլեկտրական հզորություն, ինչը բավարար է փոքր քաղաքի, այդ թվում՝ ապագա լուսնային բնակավայրի էներգամատակարարման համար։ Չեխը նշել է, որ նախագծի նպատակը փոքր չափերի միջուկային էներգիայի աղբյուրների ոլորտում տեխնոլոգիական հեղափոխություն իրականացնելն է։

Նա նաև վստահություն է հայտնել, որ Ռուսաստանը կլինի աշխարհում առաջին երկիրը, որը կարտադրի նման կայանքներ։ Ավելի վաղ «Ռոսկոսմոսի» ղեկավար Դմիտրի Բականովը հայտնել էր, որ Ռուսաստանի գիտությունների ակադեմիան հավանություն է տվել Ռուսաստանի և Չինաստանի համատեղ Միջազգային գիտական լուսնային կայանի (ILRS) ռուսական հատվածի նախագծին։ Իսկ «Ռոսատոմ»-ի ղեկավար Ալեքսեյ Լիխաչովը հայտարարել էր, որ մինչև 2030-ականների կեսերը նախատեսվում է Լուսին հասցնել ատոմային էլեկտրակայան։