Ռյուտեն ՆԱՏՕ-ն համեմատել է ֆուտբոլային թիմի հետ

ՆԱՏՕ-ի գլխավոր քարտուղար Մարկ Ռյուտեն հայտարարել է, որ դաշինքի աշխատանքը կարելի է համեմատել ֆուտբոլային թիմի հետ, որտեղ հաջողությունը կախված է յուրաքանչյուր անդամի ներդրումից։ Նրա խոսքերը փոխանցում է Clash Report-ը։

«Թույլ տվեք սկսել ֆուտբոլային համեմատությամբ․ ոչ մի թիմ չի հաղթում միայն մեկ փայլուն խաղացողի շնորհիվ։ Անհրաժեշտ են դարպասապահ, պաշտպաններ, կիսապաշտպաններ և հարձակվողներ։ Այո՛, բոլորը ուշադրություն են դարձնում հաղթական գոլի հեղինակին, բայց հաղթանակը թիմային աշխատանքի արդյունք է», — ասել է Ռյուտեն։

Նրա խոսքով՝ հաջողությունը պայմանավորված է ոչ միայն խաղադաշտում գտնվող ֆուտբոլիստներով, այլև պահեստայինների նստարանին գտնվող խաղացողներով։ Գլխավոր քարտուղարը նշել է, որ նույն սկզբունքը գործում է նաև ՆԱՏՕ-ում, որտեղ յուրաքանչյուր անդամ երկրի ներդրումը կարևոր նշանակություն ունի։

Ավելի վաղ Ռյուտեն նաև հայտարարել էր, որ ԱՄՆ-ի՝ ՆԱՏՕ-ից հնարավոր հեռանալու մասին շրջանառվող տեղեկությունները չեն համապատասխանում իրականությանը՝ ընդգծելով, որ Վաշինգտոնը շարունակում է լիարժեք ներգրավված մնալ դաշինքի գործունեության մեջ։