Ընդունվել է պատվաստումից հետո առաջացած բարդությունների դեպքում փոխհատուցումների մասին օրենքը

Ռուսաստանի Պետական դուման երկրորդ և երրորդ՝ վերջնական ընթերցմամբ ընդունել է օրենք, որով նախատեսվում է պատվաստումից հետո առաջացած բարդությունների դեպքում քաղաքացիներին փոխհատուցումներ տրամադրել ավտոմատ կարգով։ Այդ մասին հայտնում է ՌԻԱ Նովոստին։

Նոր կարգի համաձայն՝ հետպատվաստումային բարդությունների վերաբերյալ տվյալները բուժհաստատություններն անմիջապես կփոխանցեն Սոցիալական հիմնադրամին՝ առողջապահության միասնական պետական տեղեկատվական համակարգի միջոցով։ Դրա շնորհիվ փոխհատուցումները կտրամադրվեն առանց քաղաքացու առանձին դիմումի։

Եթե հետպատվաստումային բարդությունների հետևանքով մարդը մահանա, ապա նրա ընտանիքը կկարողանա դիմել փոխհատուցման համար «Գոսուսլուգի» պետական ծառայությունների էլեկտրոնային հարթակի միջոցով։

Օրենքով նախատեսվում է նաև, որ պատվավոր դոնորներին հատկացվող ամենամյա վճարներն այսուհետ ևս կկատարվեն ավտոմատ՝ արյան դոնորության տվյալների բազայի հիման վրա։ Եթե նախկինում այդ գործառույթն իրականացնում էին տարածաշրջանային իշխանությունները, ապա այժմ այն փոխանցվում է դաշնային մակարդակին։