Եվրախորհրդարանում սկանդալ է բռնկվել Ուկրաինայի հարցով

Լեհաստանից ընտրված Եվրոպական խորհրդարանի պատգամավոր Եվա Զայոնչկովսկա-Հերնիկը Ուկրաինայի թեմայով քննարկումների ընթացքում պատռել է ՕՈՒՆ-ՈւՊԱ-ի խորհրդանիշը ներկայացնող դրոշը։ Այդ մասին նա հայտնել է X սոցիալական ցանցում։

«Ո՛չ Բանդերայի նացիզմին։ Եվրոպական խորհրդարանում ես հանդես եկա Ուկրաինայի՝ Եվրամիությանը անդամակցության դեմ և պատռեցի Բանդերայի դրոշը, որը, իմ գնահատմամբ, խորհրդանշում է լեհ քաղաքացիների ցեղասպանությունը», — գրել է պատգամավորը։

Զայոնչկովսկա-Հերնիկի խոսքով՝ Ուկրաինայի իշխանությունների կողմից ուկրաինական ազգայնական շարժման պատմական գործիչների հերոսացումը արժանի է դատապարտման և կարող է դանդաղեցնել երկրի՝ Եվրամիությանն անդամակցելու գործընթացը։ Լեհաստանի և Ուկրաինայի հարաբերություններում երկար տարիներ տարաձայնությունների հիմնական թեմաներից մեկը 1939-1945 թվականներին Վոլինիայում, Արևելյան Գալիցիայում և հարակից շրջաններում տեղի ունեցած զանգվածային սպանությունների պատմական գնահատականն է։ Լեհաստանը 1943-1945 թվականների Վոլինիայի կոտորածները ճանաչել է որպես ցեղասպանություն, որի պատասխանատվությունը վերագրում է ՕՈՒՆ-ՈւՊԱ-ին։

Ավելի վաղ լեհական կողմը քննադատել էր նաև Ուկրաինայի նախագահ Վլադիմիր Զելենսկու մի շարք քայլեր, որոնք կապված էին ուկրաինական ազգայնական շարժման պատմական գործիչների հիշատակի հետ։