Հայկական պտուղ, բանջարեղեն ու գինի․ արտահանման խոշոր ցուցանիշներ հունիսին

Հայաստանը հունիսին արտահանման խթանման ծրագրի շրջանակում ապահովել է շուրջ 3 մլրդ դրամի արտահանման ծավալներ։ Այս մասին հուլիսի 9-ին Կառավարության նիստում հայտարարել է էկոնոմիկայի նախարար Գևորգ Պապոյանը։

Նախարարը նշել է, որ հունիսի սկզբին Կառավարությունը շուկաների դիվերսիֆիկացման նպատակով ներդրել էր աջակցության ծրագիր, որի շրջանակում ֆինանսական աջակցություն է տրամադրվում հայկական ծագման ջերմատնային արտադրանքի, թարմ մրգի, ինչպես նաև սննդամթերքի և խմիչքի որոշ տեսակների արտահանման դեպքում։

Պապոյանի խոսքով՝ այժմ ներկայացվում է որոշման նախագիծ, որով նախատեսվում է փոխհատուցել արտահանողների՝ հունիս ամսվա ընթացքում իրականացված արտահանման դիմաց առաջացած պարտավորությունները։

«Ծրագրի իրականացման համար հունիսին ձևավորված պարտավորությունների կատարման նպատակով անհրաժեշտ է փոխհատուցել ընդհանուր առմամբ 3 մլրդ 140 մլն դրամ»,– նշել է նախարարը։

Վարչապետ Նիկոլ Փաշինյանը, արձագանքելով թվերին, նշել է, որ 3 մլրդ դրամի փոխհատուցումը զգալի ցուցանիշ է և վկայում է արտահանման մեծ ծավալների մասին։

Ըստ էկոնոմիկայի նախարարի ներկայացրած տվյալների՝ հունիսին արտահանվել է 784 տոննա պղպեղ, 200 տոննա լոլիկ, 109 տոննա ելակ, մոտ 3000 տոննա ծիրան, 1400 տոննա կեռաս, շուրջ 1.5 մլն լիտր շշալցված բնական հանքային ջուր, ինչպես նաև շուրջ 230 հազար շիշ խաղողի գինի։

Փաշինյանը նշել է, որ Հայաստանի տնտեսությունում բալանսավորման քաղաքականությունը շարունակվում է, իսկ արտահանման այս ցուցանիշները, ըստ նրա, վկայում են արձանագրված առաջընթացի մասին։