«Արարատցեմենտ»-ի աշխատակիցները պահանջում են վերականգնել գործարանի աշխատանքը

«Արարատցեմենտ»-ի աշխատակիցներն այսօր առավոտից բողոքի ակցիա են իրականացնում գործարանի տարածքում՝ պահանջելով հնարավորություն տալ վերականգնել արտադրական գործընթացը։ Գործարանի աշխատանքը դադարեցվել է հուլիսի 6-ից, երբ տարածքը կապարակնքվել է, ինչի հետևանքով աշխատակիցները չեն կարողանում կատարել իրենց պարտականությունները։

Հիշեցնենք՝ հուլիսի 6-ի վաղ առավոտյան իրավապահները խուզարկություններ էին իրականացրել ԲՀԿ առաջնորդ Գագիկ Ծառուկյանի առանձնատանը, ինչպես նաև «Մուլտի Գրուպ» կոնցեռնի կազմում ընդգրկված մի շարք ընկերություններում։ Դրանց թվում էր նաև «Արարատցեմենտ»-ը, որի տարածքը կապարակնքվել էր։

Գործարանի տնօրեն Արտյոմ Պողոսյանը լրագրողների հետ զրույցում նշել է, որ ստեղծված իրավիճակի վերաբերյալ աշխատակիցները որևէ հստակ պատասխան չեն ստացել։

«Դիմել ենք Քննչական կոմիտե՝ խնդրելով վերացնել կապարակնիքները, որպեսզի կարողանանք աշխատել, իսկ մարդիկ կարողանան իրենց ընտանիքների հոգսը հոգալ։ Սակայն մինչ այս պահը որևէ լուծում չկա»,- ասել է նա։

Պողոսյանի խոսքով՝ իրավապահների կողմից իրականացված գործողությունների իրավաչափության վերաբերյալ իրենք հարցեր ունեն։ Նրա պնդմամբ՝ այն հիմքերը, որոնցով իրականացվել են գործողությունները, բավարար չեն եղել գործարանի աշխատանքը դադարեցնելու համար։

«Ասում ենք՝ ձեր գործողությունների հետևանքով մարդիկ զրկվել են աշխատանքից, բայց պատասխանը մեկն է՝ եթե բողոք ունեք, դիմեք այլ մարմինների»,- նշել է «Արարատցեմենտ»-ի տնօրենը։

Գործարանի աշխատակիցներն էլ իրենց հերթին նշել են, որ ստեղծված իրավիճակը լուրջ խնդիրներ է առաջացրել իրենց համար։ Նրանց խոսքով՝ շատերը ունեն վարկային և այլ ֆինանսական պարտավորություններ, իսկ գործարանի չաշխատելու դեպքում վտանգվում է իրենց եկամտի աղբյուրը։

«Մարդիկ այստեղ ընտանիքներ են պահում, ապրուստի միջոց են վաստակում։ Մեզ համար սա պարզապես գործարան չէ, սա մեր աշխատանքի ու օրվա հացի հարցն է»,- նշել են աշխատակիցները։