Էստոնիայի ռազմաօդային ուժերը վերսկսել են զորակոչիկների հավաքագրումը 22 տարի անց

Էստոնիայի ռազմաօդային ուժերը 22 տարվա ընդմիջումից հետո առաջին անգամ վերսկսել են զորակոչիկների հավաքագրումը։ Այս մասին հայտնել է ERR ազգային հանրային հեռարձակողը՝ հղում անելով Բալթյան հանրապետության Պաշտպանության ռեսուրսների նախարարությանը։

Նորակոչիկների թվում կա մեկ կին զորակոչիկ, և բոլորը կծառայեն ՀՕՊ ստորաբաժանումում։ Ուսումնական պարապմունքների ընթացքում զորակոչիկները պետք է տիրապետեն գերմանական արտադրության IRIS-T SLM միջին հեռահարության ՀՕՊ հրթիռային համակարգի շահագործմանը։ ERR-ի տվյալներով՝ այս տեսակի ՀՕՊ հրթիռային համակարգը նախատեսված է մինչև 40 կմ հեռավորության և մինչև 20 կմ բարձրության վրա ինքնաթիռներ, ուղղաթիռներ և թևավոր հրթիռներ ոչնչացնելու համար։

2025 թվականի դեկտեմբերին Էստոնիայի պաշտպանության նախարար Հաննո Պևկուրը առաջարկել է բոլոր զորակոչիկների համար զորակոչի տևողությունը մեծացնել մինչև 12 ամիս՝ սկսած 2027 թվականից։ Պաշտպանության նախարարությունը գնահատում է, որ ներկայիս ուսումնական համակարգը, որը պահանջում է ութ կամ 11 ամսվա ծառայություն՝ կախված մասնագիտությունից, այլևս չի ապահովում անհրաժեշտ ուսումնական պարապմունքների մակարդակը։