Հայտնել են կենդանիների նկատմամբ ալերգիայի դեմ պատվաստանյութերի մշակման մասին

Ռուսաստանի առողջապահության նախարար Միխայիլ Մուրաշկոն հայտարարել է, որ կենդանիների նկատմամբ ալերգիայի դեմ պատվաստանյութերը ներկայում մշակման փուլում են։

Նախարարի խոսքով՝ հակաալերգիկ պատվաստանյութերի ստեղծման աշխատանքներն արդեն ընթանում են, սակայն դրանք դեռևս չեն հասել կիրառման փուլին։

Ավելի վաղ Սեչենովի համալսարանի Մոլեկուլային բժշկության ինստիտուտի իմունոպաթոլոգիայի լաբորատորիայի աշխատակից, ալերգոլոգ-իմունոլոգ Քսենիա Ռյաբովան հայտնել էր, որ համալսարանում մշակվում են աշխարհում առաջին պատվաստանյութերը կատուների և շների նկատմամբ ալերգիայի դեմ։

Նախագծի նպատակն է ստեղծել բուժման նոր մեթոդ, որը կօգնի նվազեցնել կամ կանխել ալերգիկ ռեակցիաները ընտանի կենդանիների նկատմամբ։