Բժիշկները բացառիկ սրտի վիրահատությամբ փրկել են աղջկա կյանքը

Նովոսիբիրսկի ակադեմիկոս Մեշալկինի անվան ազգային բժշկական հետազոտական կենտրոնի սրտային վիրաբույժներն առաջին անգամ Ռուսաստանում հաջողությամբ իրականացրել են բացառիկ վիրահատություն՝ վերականգնելով ծանր բնածին արատ ունեցող աղջկա սրտի բնական աշխատանքը։

Պացիենտը Իժևսկից է և ծնվել էր սրտի ծանր արատով, որի հետևանքով ձախ փորոքը լիարժեք չէր ձևավորվել։ 2024 թվականին նրան իրականացվել էր Ֆոնտանի վիրահատություն, սակայն կես տարի անց երեխայի վիճակը կտրուկ վատացել էր։

Բժիշկները որոշել են ապամոնտաժել նախկինում ստեղծված արյան շրջանառության համակարգը, վերականգնել սրտի բնական կառուցվածքը և ապահովել երկու փորոքների բնականոն աշխատանքը։ Մասնագետների խոսքով՝ նման վիրահատությունները աշխարհում հազվադեպ են իրականացվում և համարվում են բարձր ռիսկային։

Վիրահատությունից հետո աղջիկը շուրջ երկու շաբաթ անցկացրել է վերակենդանացման բաժանմունքում, իսկ այդ ժամանակի կեսը՝ արհեստական շնչառության սարքին միացված։

Բժիշկների տվյալներով՝ այժմ նրա ձախ փորոքի ծավալը կրկնապատկվել է, և կանխատեսվում է, որ աճի հետ այն կշարունակի զարգանալ՝ ապահովելով սրտի բնական աշխատանքը նվազագույն դեղորայքային աջակցությամբ։

Մեդկենտրոնում նշում են, որ այս հաջող վիրահատությունը կարող է նոր հնարավորություններ ստեղծել նմանատիպ ծանր բնածին սրտային արատներ ունեցող հիվանդների բուժման համար։