Փորձագետը բացատրել է, թե ինչպես են խարդախները կրկին թիրախավորում նախկին զոհերին

ՌԴ կառավարությանն առընթեր Ֆինանսական համալսարանի դոցենտ Պյոտր Շչերբաչենկոն զգուշացրել է, որ ֆինանսական խարդախության զոհ դարձած մարդիկ հաճախ կրկին հայտնվում են խարդախների թիրախում։

Նրա խոսքով՝ խարդախները նպատակային ընտրում են նախկին զոհերին՝ նրանց համարելով հոգեբանորեն ավելի խոցելի։ Նրանք օգտագործում են առաջին խարդախության ընթացքում ձեռք բերված տեղեկությունները՝ գումարների չափի և դեպքի մանրամասների մասին, որպեսզի ավելի համոզիչ սցենարներ ստեղծեն։

Փորձագետի խոսքով՝ կրկնակի կապ հաստատելիս խարդախները ներկայանում են որպես իրավապահ մարմինների աշխատակիցներ կամ հորինված աջակցության հիմնադրամների ներկայացուցիչներ։ Նրանք խոստանում են օգնել վերադարձնել կորցրած գումարը կամ ստանալ պետական փոխհատուցում, ապա պահանջում են ուղարկել նախկին փոխանցումների կտրոնների լուսանկարները և SMS-ով ստացված կոդերը, որոնք իրականում հնարավորություն են տալիս մուտք գործել օգտատիրոջ պետական ծառայությունների հաշիվ։

Շչերբաչենկոն խորհուրդ է տվել անտեսել անհայտ կազմակերպություններից ստացվող զանգերն ու հաղորդագրությունները, որոնք խոստանում են վերադարձնել կորցրած գումարը, ինչպես նաև չուղարկել երրորդ անձանց բանկային քաղվածքներ, վճարումների կտրոններ կամ նախորդ դեպքերի հետ կապված նամակագրությունը։

Նա ընդգծել է, որ պետական մարմիններն ու իրավապահները երբեք չեն պահանջում փոխանցել գաղտնաբառեր, SMS-կոդեր կամ այլ անձնական տվյալներ։