Ամերիկացի ինժեներներն այցելել են Հայաստան՝ ուսումնասիրելու TRIPP («Թրամփի երթուղի») նախագծի տարածքը

ԱՄՆ-ի ինժեներական խորհրդատվական AECOM ընկերության մասնագետներն այցելել են Հայաստան՝ ուսումնասիրելու TRIPP (Trump Route for International Peace and Prosperity) նախագծի իրականացման նախատեսված տարածքը։ Այդ մասին հայտնել է ԱՄՆ դեսպանությունը Երևանում։

Դեսպանության հաղորդագրության համաձայն՝ ամերիկացի մասնագետները Հայաստանի կառավարության ներկայացուցիչների հետ համատեղ ուսումնասիրել են այն հատվածները, որտեղ ապագայում նախատեսվում է կառուցել երկաթուղային և այլ ենթակառուցվածքներ, որոնք, ըստ նախաձեռնության հեղինակների, պետք է նպաստեն տարածաշրջանի տնտեսական զարգացմանը։

Ավելի վաղ Հայաստանում Իրանի դեսպան Մեհդի Սոբհանին հայտարարել էր, որ TRIPP նախագիծն ինքնին սպառնալիք չի ներկայացնում Իրանի անվտանգության համար, սակայն ընդգծել էր, որ Թեհրանի մտահոգությունը ԱՄՆ-ի հնարավոր ներկայության վերաբերյալ իր սահմանների մոտ հասկանալի է։

Հիշեցնենք, որ օգոստոսի 8-ին Վաշինգտոնում ԱՄՆ նախագահ Դոնալդ Թրամփի միջնորդությամբ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը ստորագրել էին համատեղ հռչակագիր՝ պարտավորվելով կնքել խաղաղության պայմանագիր և կարգավորել նաև տրանսպորտային հաղորդակցությունների հարցը, որի շրջանակում նախատեսվում է իրականացնել TRIPP նախագիծը։