Քաղաքապետի խոսնակն արձագանքել է Գագիկ Ծառուկյանի կենդանիների տեղափոխման շուրջ քննադատություններին

Երևանի քաղաքապետի խոսնակ Արտյոմ Կարապետյանն անդրադարձել է Գագիկ Ծառուկյանի կենդանիներին Երևանի կենդանաբանական այգի տեղափոխելու քաղաքապետարանի առաջարկի շուրջ վերջին օրերին ծավալված քննարկումներին։

Նրա խոսքով՝ առաջարկի հիմնական նպատակը կենդանիների համար անվտանգ և մասնագիտական խնամք ապահովելն էր, մինչդեռ այն կապվեց գործարար և քաղաքական գործիչ Գագիկ Ծառուկյանի նկատմամբ իրականացվող քննչական գործողությունների հետ։ Կարապետյանի գնահատմամբ՝ առավել անհիմն էր էգ առյուծի անկման դեպքը քաղաքական ենթատեքստով ներկայացնելու փորձը։

«Այո, ցավալի է, որ էգ առյուծը սեդացիայից հետո չարթնացավ։ Սակայն սա մասնագիտական գնահատման ենթակա հարց է՝ կապված իրականացված քայլերի և հնարավոր սխալների հետ։ Միաժամանակ կանխատեսելի էր, որ դեպքը կքաղաքականացվի և կդառնա տարբեր շահարկումների առարկա»,– նշել է նա։

Կարապետյանի խոսքով՝ առյուծի անկումը որպես քաղաքական հաշվեհարդարի հետևանք ներկայացնելը ոչ թե կենդանիների նկատմամբ սրտացավության դրսևորում է, այլ մանիպուլյացիա և ցավալի դեպքը արագ փաթեթավորելու և մարդկանց թիրախավորելու գործիք։