ՄԷԳ-ը կանխատեսում է Ռուսաստանում նավթի արդյունահանման հետագա անկում

Միջազգային էներգետիկ գործակալությունը (ՄԷԳ) նվազեցրել է Ռուսաստանում նավթի արդյունահանման իր կանխատեսումը՝ դա պայմանավորելով անօդաչու թռչող սարքերի հարվածներով տրանսպորտային ենթակառուցվածքների, պահեստների և նավթավերամշակման գործարանների նկատմամբ։

Հուլիսյան զեկույցի համաձայն՝ 2026 թվականի կանխատեսումը կրճատվել է օրական 85 հազար բարելով, իսկ 2027 թվականի՝ 150 հազար բարելով։ Արդյունքում հաջորդ տարվա համար ակնկալվող արդյունահանումը գնահատվում է օրական 8,8 միլիոն բարել։

ՄԷԳ-ի տվյալներով՝ 2025 թվականին Ռուսաստանում նավթի արդյունահանումը կազմել է օրական 9,2 միլիոն բարել։ Միաժամանակ հունիսին գրանցվել է արդյունահանման փոքր աճ՝ մայիսի համեմատ օրական 120 հազար բարելով, սակայն այդ ցուցանիշը դեռևս շուրջ 900 հազար բարելով ցածր է ՕՊԵԿ+-ի սահմանած քվոտայից։

Զեկույցում նշվում է նաև, որ Ռուսաստանում նվազում են նավթի ներքին վերամշակման ծավալները, մինչդեռ ծովային արտահանման միջին ցուցանիշը հասել է ռեկորդային մակարդակի։

Ավելի վաղ ՌԴ փոխվարչապետ Ալեքսանդր Նովակը հայտարարել էր, որ երկրի մի շարք շրջաններում վառելիքի պակասը մասամբ պայմանավորված է անօդաչու թռչող սարքերի հարվածներով և արտադրության կրճատմամբ։