ԵՄ-ն ցանկանում է թույլատրել Ուկրաինային բրիտանական զենք գնել վարկային միջոցներով

Եվրամիությունը նախատեսում է թույլատրել Ուկրաինային 60 միլիարդ եվրոյի վարկային ծրագրի միջոցներով ձեռք բերել բրիտանական արտադրության սպառազինություն։ Այդ մասին հայտնում է Bloomberg-ը՝ հղում անելով իրազեկ աղբյուրներին։

Հրապարակման համաձայն՝ նախաձեռնությունը նախատեսվում է քննարկել հուլիսի 13-ին Փարիզում կայանալիք, Մեծ Բրիտանիայի և Ֆրանսիայի գլխավորած «Կամավորների կոալիցիայի» հանդիպման ընթացքում։

Ըստ աղբյուրների՝ այս քայլը դիտարկվում է որպես փոխզիջումային լուծում այն բանից հետո, երբ ԵՄ-ն և Մեծ Բրիտանիան չկարողացան համաձայնության հասնել Լոնդոնի մասնակցության շուրջ SAFE պաշտպանական հիմնադրամին, որի բյուջեն կազմում է 150 միլիարդ եվրո։

Նշվում է, որ Մեծ Բրիտանիան իր հերթին ֆինանսական ներդրում կկատարի ծրագրում այնքանով, որքանով Ուկրաինան վարկային միջոցներով պայմանագրեր կկնքի բրիտանական պաշտպանական ընկերությունների հետ։ Ներդրման չափը կախված կլինի յուրաքանչյուր պայմանագրի արժեքից և կիրառվող տոկոսադրույքներից։

Ավելի վաղ հայտնի էր դարձել, որ Ուկրաինան դեռևս չի ստացել Արժույթի միջազգային հիմնադրամի (ԱՄՀ) հերթական՝ շուրջ 700 միլիոն դոլարի վարկային տրանշը, որի տրամադրումը հետաձգվել է ավելի քան մեկ ամսով։