Ռուսական «Դրոնլոկը» FPV դրոնները կհայտնաբերի մինչև 2 կմ հեռավորությունից

Ռուսական «Դրոնլոկ» ակուստիկ հայտնաբերման համակարգը կարող է FPV տիպի անօդաչու թռչող սարքեր հայտնաբերել մինչև 2 կիլոմետր հեռավորությունից։ Այդ մասին հայտնել է «ՌՄՍ-Ալգորիթմ» ընկերության ներկայացուցիչը՝ Կազանում անցկացվող «Drone Expo–2026» ցուցահանդեսի շրջանակում։

Նրա խոսքով՝ համակարգը Mavic 3 տեսակի փոքր դրոնները հայտնաբերում է մինչև 800 մետր հեռավորությունից, 8-դյույմանոց FPV դրոնները՝ մինչև 2 կիլոմետրից, իսկ «Բաբա Յագա» տիպի խոշոր անօդաչու սարքերը՝ 3–5 կիլոմետրից։

Ներկայացուցչի խոսքով՝ «Դրոնլոկը» պասիվ ակուստիկ համակարգ է, որը բաղկացած է միկրոֆոններից և ազդանշանի նախնական մշակման սարքերից՝ օդում շարժվող դրոնների ձայնային ազդանշանները որսալու և վերլուծելու համար։

Ավելի վաղ հաղորդվել էր, որ «Ուխո» անունով մեկ այլ ռուսական ակուստիկ համակարգ արդեն կիրառվում է Բելգորոդի մարզում և Դոնեցկի ինքնահռչակ ժողովրդական հանրապետությունում՝ հեռահար դրոն-կամիկաձեների հայտնաբերման նպատակով։