FT․ Եվրամիությունը պատրաստվում է արգելել կայքերում և հավելվածներում կիրառվող «մութ հնարքները»

Եվրոպական հանձնաժողովը պատրաստում է օրինագիծ, որը պետք է սահմանափակի, այսպես կոչված, «մութ հնարքների» օգտագործումը՝ կայքերի և բջջային հավելվածների դիզայնում, որոնք դրդում են օգտատերերին գնումներ կատարել, բաժանորդագրություններ ձևակերպել կամ ավելի շատ ժամանակ անցկացնել ծառայություններում, հայտնում է Financial Times-ը։

Արդարադատության հարցերով եվրահանձնակատար Մայքլ Մաքգրաթը հայտարարել է, որ նոր միջոցառումներն ուղղված են թվային միջավայրում սպառողների պաշտպանության բացերի վերացմանը։ Հատուկ ուշադրություն է նախատեսվում դարձնել երեխաների և դեռահասների պաշտպանությանը, որոնց Բրյուսելում համարում են համացանցի առևտրային մանիպուլյացիաների նկատմամբ ամենախոցելիները։

Օրինագիծը նախատեսում է պայքար բաժանորդագրական թակարդների, կախվածություն առաջացնող հավելվածների դիզայնի և այլ մեխանիզմների դեմ, որոնք օգտատերերին դրդում են լրացուցիչ ծախսերի։ Բացի այդ, Եվրոպական հանձնաժողովը ցանկանում է ստանալ իրավունք ինքնուրույն կիրառելու պատժամիջոցներ, ներառյալ տուգանքներ, խոշոր թվային հարթակների, տեսախաղերի մշակողների և առցանց խանութների նկատմամբ, որոնք խախտում են սպառողների պաշտպանության կանոնները։

Ներկայումս օրենսդրության պահպանման վերահսկողությունն իրականացնում են ԵՄ երկրների ազգային մարմինները՝ Եվրոպական հանձնաժողովի համակարգմամբ։ Ըստ Մաքգրաթի, այդ համակարգը բավականաչափ արդյունավետ չի եղել և մինչև օրս չի հանգեցրել ոչ մի տուգանքի կիրառման։

Նախաձեռնությունը քննարկվում է համացանցում երեխաների պաշտպանության վերաբերյալ ավելի լայն քննարկման ֆոնին։ Եվրամիությունում դիտարկվում են լրացուցիչ միջոցներ, ներառյալ սոցիալական ցանցերից օգտվելու հնարավոր տարիքային սահմանափակումները։ Միևնույն ժամանակ Եվրոպական հանձնաժողովի ներսում միասնական կարծիք չկա․ որոշ երկրներ, մասնավորապես Լեհաստանը, կարծում են, որ նոր նորմերը կարող են կրկնօրինակել արդեն գործող օրենսդրությունը, ներառյալ Թվային ծառայությունների մասին օրենքը (DSA)։

Մաքգրաթի կարծիքով, խնդիրը հնարավոր չէ լուծել սոսկ արգելքով։ Ծառայությունների դիզայնի կարգավորումից բացի, անհրաժեշտ են լռելյայն ավելի խիստ գաղտնիության կարգավորումներ, ծնողական վերահսկողության ուժեղացում և երեխաների թվային գրագիտության բարձրացում։