Դատախազության նախաձեռնած միջոցառումների արդյունքում Վանաձոր համայնքին վերադարձվել է Հրանտ Մաթևոսյանի անվան այգու տարածքում գտնվող ևս երկու հողատարածք

ՀՀ գլխավոր դատախազության հաղորդմամբ՝ Լոռու մարզի դատախազությունում, Լոռու մարզպետի միջնորդությամբ իրականացված ուսումնասիրությունների արդյունքում պարզվել է, որ Վանաձորի Հրանտ Մաթևոսյանի անվան այգու տարածքները վարձակալած և փաստացի օգտագործող 22 սուբյեկտ դրանք շահագործել են պայմանագրերի խախտումներով և ոչ նպատակային, ինչի հետևանքով այգին հայտնվել է անբարեկարգ վիճակում։

Դատախազությունը միջնորդագիր է ներկայացրել Վանաձորի համայնքապետարան՝ հիշյալ 22 սուբյեկտների հետ կնքված վարձակալության և անհատույց օգտագործման պայմանագրերը դադարեցնելու նպատակով։

Արդյունքում՝ 2026 թվականի հուլիսի 2-ին դադարեցվել է Կ. Դեմիրճյան փողոցի 25-1/6 և 25-1/3 հասցեներում գտնվող՝ համապատասխանաբար 434 և 48 քառակուսի մետր մակերեսով երկու հողատարածքի վարձակալության իրավունքը։ Շուկայականին մոտարկված կադաստրային արժեքով՝ ավելի քան 5 միլիոն դրամ գնահատված հողամասերը վերադարձվել են Վանաձոր համայնքի տիրապետմանը։