«Եթե գործարանը չբացվի, փողոցներ կփակենք». «Երևանի Արարատ»-ի աշխատակիցների ահազանգը

«Երևանի Արարատ կոնյակի-գինու-օղու կոմբինատ»-ի աշխատակիցները բողոքի ակցիա են իրականացրել՝ պահանջելով վերականգնել գործարանի աշխատանքը, որը, նրանց խոսքով, արդեն շուրջ մեկ շաբաթ է դադարեցված է։

Գործարանի սեփականատերը ԲՀԿ նախագահ Գագիկ Ծառուկյանն է, որը ներկայում կալանքի տակ է։ Աշխատակիցների պնդմամբ՝ գործարանը, ինչպես նաև նրան պատկանող մի շարք այլ ընկերություններ, իրավապահների կողմից կապարակնքվել են, ինչի հետևանքով արտադրական գործընթացը կանգ է առել։

Ակցիայի մասնակիցներից մեկը նշել է, որ ստեղծված իրավիճակը ծանր սոցիալական հետևանքներ է առաջացրել աշխատակիցների և նրանց ընտանիքների համար։

«Գործարանը պետք է վերաբացվի։ Մարդիկ վարկային պարտավորություններ ունեն, ընտանիքներ են պահում։ Արդեն մեկ շաբաթ է՝ չենք աշխատում, և դեռևս պարզ չէ, թե որքան կշարունակվի այս վիճակը։ Մեր խնդրանքն է՝ լսել մարդկանց ձայնը և հաշվի առնել նրանց խնդիրները»,– ասել է նա։

Մեկ այլ աշխատակից նույնպես ընդգծել է, որ գործարանի փակ լինելու պատճառով բազմաթիվ մարդիկ կանգնել են ֆինանսական դժվարությունների առաջ։

«Մենք վարկեր և այլ պարտավորություններ ունենք։ Եթե այս իրավիճակը շարունակվի, չենք պատկերացնում, թե ինչպես ենք կատարելու վճարումները։ Պետք է հնարավորինս արագ լուծում գտնվի, որպեսզի կարողանանք վերադառնալ մեր աշխատանքին»,– նշել է նա։

Աշխատակիցը նաև հավելել է, որ գործարանում աշխատում է արդեն ութ տարի և այդ ընթացքում երբևէ աշխատավարձի ուշացման կամ աշխատանքային խնդիրների չի բախվել՝ շնորհակալություն հայտնելով ղեկավարությանը ստեղծված աշխատատեղերի համար։