Զգուշացեք «մեկ ամիս անվճար տրանսպորտ» կեղծ առաջարկներից

ՆԳՆ ոստիկանությունը զգուշացնում է, որ վերջին շրջանում Facebook և Instagram սոցիալական հարթակներում «Telcell Wallet»-ի անունից տարածվում են կեղծ գովազդներ, որոնցով քաղաքացիներին առաջարկվում է մեկ ամիս անվճար օգտվել Երևանի հանրային տրանսպորտից։

Գովազդում տեղադրված հղմամբ անցնելուց հետո օգտատերերից պահանջվում է մուտքագրել հեռախոսահամարին ուղարկված հաստատման կոդը։ Այդ կոդը տրամադրելու դեպքում հանցավորները ձեռք են բերում հասանելիություն «Telcell Wallet»-ի հաշվին և կարողանում են հափշտակել ինչպես էլեկտրոնային դրամապանակում եղած գումարները, այնպես էլ դրան կցված բանկային քարտերի ֆինանսական միջոցները։